|
Partia Demokratike Shqiptare - Preshevë
Letër përgëzimi drejtuar Institucioneve të Republikës së Kosovës
Të nderuar udhëheqës institucional shtetërorë të Republikës së Kosovës ju përgëzoj me rastin e konstatimit pozitiv të GJND-së për shtetësinë e Kosovës. Me këtë rast shprehet gëzimi i qytetarëve shqiptarë të komunës së Preshevës dhe më gjerë gjithandej ku jetojnë shqiptarë për datën 22 korrik kur Gjykata Ndërkombëtare e Drejtësisë ka konstatuar se shpallja e pavarësisë së Kosovës nuk e ka shkelur të drejtën ndërkombëtare dhe nuk është e paligjshme.
Ky vendim do të jetë në të mirën e popullit të Kosovës dhe shqiptarëve që jetojnë si në Shqipëri, Maqedoni, Mal të Zi dhe në Luginë të Preshevës. Vendimi i Gjykatës së Hagës për ligjshmërinë e shpalljes së pavarësisë së Kosovës tani do të përcaktojë proceset e mëtejme politike të Kosovës dhe të Serbisë gjë për të cilën shpresojmë se do të hapen rrugë të zhvillimeve të reja në Ballkan me theks të veçant zgjidhja e çështjes shqiptare në Luginë të Preshevës.
Kryetari i komunës së Preshevës dhe i Partisë Demokratike Shqiptare
Ragmi Mustafa
Preshevë
23 Korrik 2010 |
