|
Federata Shqiptare e Futbollit po projekton një miqësore me përfaqësuesen turke. Ende nuk është arritur një akord mes palëve, por gjithçka pritet të zgjidhet në fund të nëntorit, kur drejtuesit e institucionit të futbollit në vendin tonë të takohen sërish me homologët e tyre turk në fund të muajit nëntor. “Do të ketë sërish një takim mes drejtuesve të FSHF-së dhe federatës turke, – ka thënë zëdhënësi për shtyp, Lysjen Nurishmi.
Gjatë takimit do të diskutohet edhe për një miqësore të mundshme mes skuadrave të dy vendeve. Nëse arrihet akordi, detajet e ndeshjes do të vendosen gjatë takimit”. Ka shumë gjasa që kundër Turqisë të luajmë më 7 shkurt të vitit të ardhshëm, datë e përcaktar nga UEFA për miqësore. Në fakt trajneri i Kombëtares, Oto Bariç ka bërë të ditur dje se nuk dëshiron që kundërshtari i Shqipërisë në miqësoren e shkurtit të jetë i një niveli të lartë. Ai ka thënë se do të preferonte skuadra si Bosnja, San Marino apo Andorra, në mënyrë që kuqezinjtë të zhbllokoheshin në prag të ndeshjes me Slloveninë. “Do të preferoja që më 7 shkurt të luanim kundër një skuadre të një niveli më të ulët se i yni. Një ndeshje e fituar para sfidës me Slloveninë është inkurajuese, pavarësisht se bëhet fjalë vetëm për një miqësore”. Trajneri ka thënë se deri në muajin mars do të zhvillojë tre ose katër teste me futbollistët e rinj të kampionatit shqiptar dhe të përfaqësueses U-21. |
