|
Në konferencën e sotme për media, Lëvizja për Bashkim shprehu qëndrimin e saj lidhur me zhvillimet aktuale politike dhe bisedimet Kosovë-Serbi nën dritën tyre. Nënkryetari për Politikë i LB-së, Raif Qela, situatën e tensionuar në Kosovën Lindore e konsideroi pasojë të drejtpërdrejtë të çështjes së pazgjidhur kombëtare të popullit shqiptar në Preshevë, Bujanoc e Medvegjë. Ai tha se fajin më të madh për këtë gjendje të rëndë të krijuar nga dhuna e vazhdueshme serbe mbi popullatën shqiptare e bartin institucionet e Kosovës dhe ato të Shqipërisë për shkak të heshtjes shumëvjeçare të kësaj çështjeje dhe për shkak të gabimit themelor të tyre në trajtimin e shqiptarëve në Kosovën Lindore si pakicë kombëtare duke kërkuar nga subjektet politike të atjeshme që të gjitha çështjet t’i adresojnë në institucionet e Serbisë.
Në vazhdim, z.Qela, shprehu mbështetjen e plotë të Lëvizjes për Bashkim për konkluzionet e mbledhjes së këshilltarëve komunal të Preshevës, Bujanocit e Mevegjës të datës 12.1.2013, si dhe shpalosi qëndrimin e LB-së për hapat që duhet të ndërmerren në këtë situatë. Veprimet që duhet të bëhen, sipas Lëvizjes për Bashkim, janë:
1) Institucionet e Kosovës dhe ato të Shqipërisë duhet që çështjen e pazgjidhur shqiptare në Preshevë, Bujanoc e Medvegjë ta ngrisin në të gjitha instancat ndërkombëtare;
2) Republika e Shqipërisë të përpiqet për thirrjen e një seancë të jashtëzakonshme të Këshilli të Sigurimit të OKB-së për gjendjen e rëndë të popullit shqiptar në Preshevë, Bujanoc e Medvegjë;
3) Qeveria e Kosovës çështjen e shqiptarëve të Kosovës Lindore duhet ta shtrojë në bisedimet Kosovë-Serbi mbi bazën e reciprocitetit me komunat veriore Leposaviq, Zveçan e Zubin Potok.
Prishtinë, 15.1.2013
|
