| REAGIMI PA FAKTE ËSHTË HIPOKRIZI! |
| Publikuar më 28 nntor, 2013 në orën 13:23 ( ) |
Sami Islami | Opinion | |
|
|
|
REAGIM
(Përkitazi me “reagimin” e “Balkan Muslim Society – Drita, Londër)
Në numrin e shtatorit të këtij viti, gazeta “The Albanian” që del në Londër botoi një “reagim” të Komunitetit Mysliman të Ballkanit (!) të ashtuquajtur “Drita”. Në kuadrin e kësaj shoqate qenkan disa hoxhallarë që, me sa duket, pasi i paskan “rregulluar” të gjitha punët e tyre, u paska mbetur edhe një punë pa kryer. Dhe kjo qenka puna për ta “ mbrojtur ” myslimanizmin e islamizmin prej meje, që sipas tyre, paska qenë “i rrezikuar”! Një herë mendova të mos reagoj fare, por duke e parë gjithë atë vrer të thënë ndaj meje, m’u desh t’u them nja dy-tri fjalë.
E para: Është hera e dytë që kjo shoqatë myslimane (shqiptare?!) e Londrës reagon ndaj shkrimeve të mia. Hera e parë ishte vitin e kaluar, por unë atëherë nuk reagova. Po këta frikacakë analfabetë nuk u ndalën me aq. Sigurisht që u paska mbetur “ëmbël” nga reagimi i tyre i parë, në të cilin unë nuk u përgjigja. Kësaj radhe me reagimin e tyre dhe me të pavërtetat e tyre, vërtetë e mbushën kupën!
Që në fillim, më duhet të theksoj, se tingëllon shumë paradoksale kur ju autorët e reagimit shpreheni, në emër të “demokracisë dhe lirisë së shprehjes së mendimit” (duke ma përmendur emrin tim hiç më pak se 33 herë brenda artikullit), e ju në emër të kësaj “demokracie” rrini fshehur në birë të minit, duke mos guxuar ta nxirrni kokën jashtë! Dhe a ka më demagogji kur në reagimin tuaj deklaroni se “demokracia i jep të drejtë gjithkujt të thotë mendimin e tij dhe të kërkojë të drejtën e tij” , duke ma “mohuar” mua atë që vetë e keni deklaruar. E kjo nuk është asgjë tjetër pos një hipokrizi me brirë!
Po le t’i shohim marifetet tuaja të tjera! Së pari, a mund të më tregoni ju frikacakë analfabetë , se kush jeni ju që po flisni në emër të “myslimanëve mbarëshqiptarë”? Pse s’ guxoni ju të dilni me emër e mbiemër siç kam dalë unë? A e dini ju sa shqiptarë mylimanë janë në trevat shqiptare? A e keni marrë ju pëlqimin nga të gjithë këta shqiptarë myslimanë që po flisni në emër të tyre? Mos po kujtoni ju që lexuesi i nderuar, që e di se ç’është demokracia, do t’u besojë këtyre brroçkullave tuaja? Po, a ju paskeni mbetur t’i mbroni “myslimanët mbarëshqiptarë”? Mjerë ata myslimanë “mbarëshqiptarë” nëse paskan mbetur t’i mbroni ju! Dhe tjetra; nga e morët vesh ju që shkrimi im “paska ngjallur indinjatë te thellë tek mjaft besimtarë myslimanë”? Kush qenkan ata myslimanë që qenkan “indinjuar” nga shkrimi im? A patët ju mundësi t’i pyesni të gjithë shqiptarët për artikullin tim? Këtu është krejt e qartë, përveç jush, frikacakë dhe analfabetë dhe qyqarë njëkohësisht dhe ndonjë mik fanatik i juaji, tjetër nuk besoj se ka!
Shkrimi im , po ju them edhe një herë troç, se nuk ishte as kundër myslimanizmit as kundër islamizmit. Shkrimi im ishte kundër propagandës së disa hoxhallarëve të shitur (edhe kundër jush që po i mbroni ata, pra!), si Irfan Salihu, Shefqet Krasniqi , ose Naim Tërnava, që kanë dalë hapur ndaj figurave kombëtare e historike si, kundër Skënderbeut, Nënës Terezë, Pashko Vasës, Pjetër Bogdanit…
Kur jemi këtu duhet të përmendim faktin se këta hoxhallarë janë futur në shërbim të propagandas së huaj për të ndërtuar edhe xhami të tjera në trevat shqiptare, jo pse ne nuk kemi xhamia, por pse ata duan të futen në trevat shqiptare nëpërmes tyre. Ne kemi pasur dhe kemi xhamia në treva shqiptare, të cilat janë ndërtuar nga vetë shqiptarët. Ato qenë xhamia tona! Fundja këto xhamia (të rejat, pra) nuk po ndërtohen me buxhetin tonë, por me investime nga jashtë, sidomos nga Turqia! A mos po kujtoni ju frikacakë dhe analfabetë se Turqia i bën këto investime kot? Jo asesi! Qëllimi i fundit i saj është radikalizimi i fesë myslimane në Kosovë dhe në njëfarë mënyre edhe turqizimi i saj. Si mund të shpjegohet fakti që myftiu i Kosovës Naim Tërnava, personin që ju po respektoni tej mase , të kërkojë ndihmë nga kryeministri turk Erdogan për ndërtimin e xhamisë së madhe në Prishtinë! A mund të ndodh ky skandal diku tjetër në Evropë, pos në Kosovë, ndoshta edhe në Shqipëri? Një myfti i një shteti të pavarur kërkon ndihmë nga një kryeministër i një shteti tjetër për ndërtimin e xhamisë në shtet të vet!
Pastaj vetë kryeministri turk Erdogan dhe ministri i jashtëm i Turqisë në një takim që kishin pasur në Stamboll, me një delegacion kosovar, me në krye kryeparlametarin Jakup Krasniqi, temë qendrore kishte qenë, jo marrëdhëniet tregtare e ekonomike në mes dy shteteve, po mu ndërtimi i xhamisë në Prishtinë! A po e shihni ju o miopë ose të shitur, se këtu nuk është thjesht çështje se “myslimanët shqiptarë që nuk paskan se ku të falen”, por çështje politike? Turqia tani po tenton “ta pushtojë” Kosovën dhe Shqipërinë me forma të ndryshme, jo më me shpata e me topa si disa shekuj më parë! Prandaj s’është çudi që “vëllazërit turq” , kohë më parë nisën të gjejnë vërejtje, dhe ta ndërrojnë edhe historinë shqiptare (A reagoi BIK-u për këtë?) duke dashur që Perandorinë Otomane ta trajtonin si “çlirimtare”!
Edhe pse ju analfabetë jetoni në luksin e Londrës, mendoj se e dini se në çfarë varfërie jeton sot Kosova? Duhet ta kuptoni që shumë më patriotike do të ishte sikur me ato shpenzime të ndërtoheshin shkolla, spitale, se të shpenzoheshin për xhamia, që, po të flasim drejt, kurrë më shumë se tani nuk kemi pasur xhamia në raport me numrin e besimtarëve! Pa më thoni ju analfabetë, sa për qind të atyre 95% të shqiptarëve myslimanë shkojnë ne xhami sot? As 1% ! Dhe pasi t’ju “shterren” fondet prej nga po i paguani për të ardhë në xhami do të mbeteni edhe pa atë përqindje! Dhe sa xhamia i kemi? Ju ndoshta e dini, po e di edhe unë. Vetëm në Prishtinë duhet të jenë rreth 50 xhamia, kurse në tërë kosovën janë rreth 650 sosh! A nuk është paradoksale konstatimi i juaj se “ajo xhami, që është planifikuar të ndërtohet në Prishtinë duhet të ndërtohet se “xhemati” nuk paskan se ku me u falë!?
Në të njejtën kohë të gjithë e dinë se vetëm në qendër të Prishtinës janë 7-8 xhami që kurrë nuk mbushen me besimtarë (përveç, ndoshta, të premeteve, ose festave fetare)! Ju e dini shumë mirë këtë apo jo? Pastaj ju e dini mirë se projekti i xhamisë së madhe të Prishtinës parasheh që në kuadrin e saj të ndërtohen edhe 80 lokale afartiste! A ndërtohet xhamia për t’u falur, apo për të bërë biznes?
Edhe diçka: xhamia ndërtohet për t’u falë në të, kurse minarja është për ta thirrë hoxha ezanin. Kështu ka qenë me xhamia tona shqiptare. Sa herë që ishte koha e faljes hoxha hipte në minare dhe thirrte ezanin. Bile mua si fëmijë më pëlqente kur hoxha thërriste ezanin! Kështu veprohej në çdo xhami në trevat shqiptare. Por kohëve të fundit, po ndërtohen xhami të tjera, minaret e të cilave janë me nga dy rrathë; diku- diku, sot, minaret po bëhen edhe me nga tre rrathë! Nëse minarja shërben që hoxha të hipë atje për të thirrë ezanin, a nuk po mjaftoka vetëm një rreth a? A mos vallë po u dashka tani (me këtë myslimanizmin e ri) që në minare të hipin nga dy apo tre hoxhallarë për ta thirrë ezanin në të njejtën kohë?!! Kur të kihet parasysh se disa xhami tani i kanë edhe nga dy, tri apo katër minare, atëherë po del që në kohë namazi po u dashka që në secilën minare të hipin nga dy, tre hoxhallarë, për ta thirrë ezanin!!! Nëse ndodh kjo hajde e dëgjoji tani!
Po jo, se në kohë të fundit punën e hoxhallarëve për ta thirrë ezanin e kanë “zëvendësuar” altoparlatët! Në të gjitha xhamitë sot në kosovë ( edhe në ato të vjetrat, bile) hoxhallarët më nuk hipin në minare, se altoparlatët po e bëjnë punën e hoxhallarëve! Kjo puna e altoparlantëve është një provokim i hapur ndaj të gjithë atyre që, pavarësisht se a janë apo jo fetarë, nuk duan ezane shurdhuese. Qeveria maqedonase , per shembull ka marrë vendim që altoparlantët të mos bëjnë më shumë zë se që do të kishte bërë vetë hoxha kur thërret ezanin! Në Prishtinë, për shembull, nga altoparlatët njerëzit nuk mund as të flejnë natën, se për ditën u muar vesh. Në orën një të premteve, nga altoparlatët nuk e di njeriu se ku është? Në Turqi, Arabi, Afganistan, apo Pakistan!
Ju edhe në Londër, ku ju ka mbytur “salltaneti”, në vend se të përhapni rrugën e Zotit, po futni përçarje në mes të besimtarëve shqiptarë. Ka shumë fakte të dokumentuara, që ju hoxhallarët shqiptarë e keni sjellë gjendjen deri aty sa që është dashur ndërhyrja e policisë angleze në xhaminë shqiptare në Londër! Pse nuk po falen në xhaminë e shqiptarëve të gjithë besimtarët shqiptarë, që kontribuan vetë për ta blerë atë, por pothuaj të gjithë besimtarët myslimanë shqiptarë po falen në xhamitë e tjera, turke, arabe e ku di unë ? Pse ju nuk po merreni me këto çështje, por po merreni kundër fjalës sime të lirë, krejt pse e kam thenë një të vërtetë që juve po ju dhemb?
E dyta: Pse ju , frikacakë analfabetë , kurrë nuk e keni hapur gojën kundër “vehabizmit”? Rrymë kjo që është duke u përhapur me të madhe në Kosovë dhe në Shqipëri. Rrymë, të cilën në heshtje po e përkrah edhe myftiu i Kosovës z. Tërnava. Duke e mbrojtur këtë rrymë kështu, si ju në Londër, poashtu edhe kreu i juaj Naim Ternava jeni tamam ekstremistë! Pse nuk flisni për Shefqet Krasniqin , Irfan Salihun , e disa hoxhallarë të tjerë që janë duke bërë propaganda ndër më të pistat kundër figurave më të ndritura të kombit tonë (për çfarë i përmenda më lart), por edhe kundër femrave shqiptare, duke i etiketuar ato, (gratë motrat dhe nënat tona , pra edhe të juajat sigurisht) me fjalët më të ndotura?!
Se këto rryma që po servohen tani, përveç tjerash, nuk po përkojnë me nënyrën e të praktikuarit tradicional, çfarë e kanë aplikuar baballarët tanë, që e kanë kundërshtuar edhe vetë disa hoxhallarë, si imami i xhamisë së Podujevës Idriz Bilalli dhe dr. Musli Verbani i Kaçanikut( shih emisionin “Rubikon” në KTV, të 11 qershorit 2013!).
E shihni pra se edhe vetë hoxhallarët patriotë po e thonë të njejtën gjë që e kam thënë edhe unë. Dihet se islamizmi dhe myslimanizmi tradicional ka ekzistuar me shekuj ndër shqiptarë (ekziston edhe tani), por asnjëjherë nuk janë krijuar kësi radikalizmash në këtë fe, siç kanë nisur të krijohen tani.
Shkojmë më tutje! Në “reagimin” tuaj ju përpiqeni ta nxjerrni Perandorinë Osmane, si “çlirimtare”!! Ju duhet ta kuptoni se Perandoria Otomane ishte pushtuese. Dhe vetë fjala “pushtuese” do të thotë se ajo nuk erdhi “mysafire” me lule në dorë në trevat tona. Ajo erdhi me ushtri me shpata e me topa! Ajo ishte ushtri armike. Edhe Sami Frashëri, emrin e e të cilit ju e përdorni si njeri të privilegjuar nga Porta, që sipas jush, “paska jetuar ne pallatin e sulltanit” Perandorinë Otomane e quan pushtuese. Ja si shprehet pra ai: “Pushtimi osman ka qenë për popullin shqiptar një ndërprje fatale e procesit historik dhe e gjithë çështja është të rikthehemi atje ku u ndërpre dhe që aty të ecim përpara!”
Duke kalëruar lart e poshtë, në “reagimin” tuaj “konstatoni” se “nga Londra paskan shkuar në Luftën e Kosovës 120 hoxhollarë apo studijues të fesë , kurse 36 hoxhollarë paskan ra dëshmorë”! Se kanë shkuar në luftë 120 shqiptarë nga Londra këtë nuk e kontestoj, por se kanë shkuar 120 hoxhallarë, kjo është një gënjeshtër e madhe! Sipas kësaj që ju po thoni në Londër vetëm hoxhallarë dhe studiues të fesë paska pasur! Shqiptarë të profesioneve të tjera jo! Nëse këta 120 vetë kanë qenë hoxhallarë (sipas jush) dhe paskan shkuar në Kosovë për të dhënë edhe jetën, unë s’po kuptoj juve, që edhe ju jeni hoxhallarë, si dhe trima që jeni e nuk guxuat të dilni haptas me emër e mbiemër as në gazetë! Kjo është paradoksale! Nuk është mirë të gënjeni dhe t’i përgojoni ata që shkuan në luftë! Ju duhet ta dini se ata që shkuan në luftë, nuk shkuan për ta mbrojtur myslimanizmin (ose siç po thoni ju “shqiptarët myslimanë”, por shkuan për ta mbrojtur qenien tonë kombëtare pa dallim feje, për çka meritojnë respekt.
Në “reagimin tuaj gjejmë edhe kësi konstatimesh qesharake: “A e di z. Islami dhe “sekularët” e llojit të tij ekstremist se, historia na tregon që mbledhja themeluese e Lidhjes së Prizrenit, e cila i hodhi bazat e shtetit të ardhshëm shqiptar, është mbajtur në xhami, e jo në atë që sot njihet Shtëpia e Lidhjes së Prizrenit…” O tempora o mores!(O njerëz të çuditshëm, o kohëra të çuditshme!) Po çfarë rëndësie paska fakti se mbledhja themeluese e Lidhjes Shqiptare të Prizrenit qenka mbajtur në xhami apo në shtëpi tjetër (që sot është shtëpi muze)? Po ju o analfabetë duhet ta dini se ato objekte fetare apo kulturore ishin tonat, si xhamiat, si objektet e tjera! Edhe nëse mbledhja qenka mbajtur në xhami , çka po doni të thoni ju me këtë? Të gjitha ato objekte pra, ishin ndërtuar nga dora dhe djersa e popullit tonë! Me rëndësi ishin dhe janë edhe sot vendimet që u morën nga njerëzit tanë patriotë, pa marrë parasysh se a ishin ata haxhij, imamë. Ju duhet ta dini se nuk ka asnjë rëndësi se Ymer Prizreni paska qenë edhe haxhi. Po a e dini ju se po të kishte mbetur ai vetëm hoxhë apo haxhi, pa u inkuadruar në çështjen kombëtare, Perandoria nuk do ta kishte ndjekur kurrë, madje as nuk do ta kishte likuiduar fare, siç edhe e likuidoi më vonë me dorën e vet të zgjatur sulltani. Ai bëri shumë për çështjen atdhetare. Me rëndësi është dhe unë i përkulem veprës së tij dhe të gjithë hoxhallarëve patriotë si ai, që themeluan Lidhjen Shqiptare të Prizrenit. Mos harroni se një prej prijësve eminetë në atë mbledhje ka qenë edhe Abdyl Frashëri, i cili nuk ka qenë hoxhë, apo jo?
Në lidhje me atë që ju flisni me përqindje se cila fe është më e përhapura tek shqiptarët, jam kurioz të di nga e dini ju se janë 95% të shqiptarëve në Kosovë të besimit islam dhe 75% të tillë në Shqipëri? Nga cili regjistrim i popullsisë i morët këto të dhëna? Apo jeni duke “ia keni futur kot”, ashtu siç ia keni futur kot në krejt “reagimin “ e juaj!
Nëse, sipas jush, në Kosovë qenkan 95% myslimanë, atëherë edhe në UÇK përqindja ka qenë dashur të jenë 95% myslimanë. Këta 95% myslimanë qenka dashur të luftojnë në flamurin fetar mysliman! Por të gjithë luftuan nën flamurin tonë kombëtar. Të gjithë lapidarët që u ndërtuan pas luftës figuron flamuri kombëtar. Në asnjë lapidar nuk ka simbole fetare, por kombëtare. Atëherë a ishin këta luftëtarë shqiptarë që luftuan, për komb apo për fe?
Nuk e di se a jeni te vetëdijshëm se duke i përdorë këto përqindje ju vetë po dilni në kontradiktë me veten. Ja nje fjali tuajën: “Rezultatet e kësaj veprimtarie antiislame, të këtij ekstremizmi të djallëzuar, janë tepër negative, veçanërisht për konsolidimin dhe fuqizimin e shtetit të ri të Kosovës që, ende ka rrugë të gjatë për të bërë për të fituar njohjen e plotë si shtet i pavarur dhe për të vazhduar më pas në hedhjen e hapave politikë e për integrimin Euro-Atlantik”. Ju në njërën anë thoni se 95% të shqiptarëve janë myslimanë, që , sipas kësaj përqindje tuajën, të gjithë shqiptarët do të duhej të integroheshin në ndonjë aleacë islamike (se janë myslimanë, apo jo?), kurse në fjalinë që e keni shkruar ju thoni se Kosova ka qëllim integrimin Euro -Atlantik?! Mos po harroni se Europa nuk është myslimane? Evropa është kristiane, apo jo? E si atëherë ju thoni se Kosova duhet të inkuadrohet në familjen Europiane, e në anën tjetër ju thoni se në Kosovë jetojnë 95% myslimanë!? A po e shihni se nuk jeni në tokë të bukës dhe se nuk po dini se çka po shkruani? Ju jeni paradoksal edhe në konstatimin tim kur kam thënë. Citoj: “ Disa vjet më parë mu në mes të Prishtinës u ndërtua një kishë katolike. Kjo kishë, nuk besoj se ishte një nevojë aq e shqiptarëve të besimit katolik, sa qe , në njëfarë mënyre një simbol se shqiptarët ishin më shumë të orientuar nga Perëndimi, si një mirënjohje ndaj misionarës sonë të madhe Nënës Terezë, që populli ynë ia dha njerëzimit.”
Dhe përgjegja juaj ishte: “Përsa i përket pretendimit të z. Islami se katedralja e Prishtinës u ndërtua si symbol i drejtimit të shqiptarëve drejt Perëndimit , se kuptojmë se cilëve shqiptarë u referohet autori i artikullit. A mos e ka fjalën për 95% shqiptarëttë popullsisë Myslimane të popullsisëe të Kosovës?? A po e shihni ju vetë se jeni paradaoksal me veten tuaj. Nëse ata 95% të myslimanëve që thatë ju pak më parë po pretendokan të integrohen në aleancën Euro -Atlantike, po këta 95 % janë ata që po aspirojnë Perëndimin! Pse ore ju “myslimanë të devotshëm” po aspironi Perëndimin e jo Lindjen? Pse nuk shkuat të jetoni në shtete të lindjes, në Arabi, Pakistan, Afgasnistan, Turqi etj., por ju erdhet në Perëndim. E hani bukën e të Perëndimit po sytë i mbani nga Lindja! Paradoks i vërtetë! A janë këto fakte që ju nuk po dini se çfarë po thoni?
Për të gjithë lexuesit që dëshirojnë të dinë se çfarë kam thënë unë në shkrimin tim, le të klikojnë këtu:http://tribunashqiptare.net/?p=16112
E treta: Ju më akuzoni se unë i paskam quajtur bashkëkombasit e mi “trushpërlarë! Po si do t’i quanit ju gjithë ata njerëz që me orkestrimin e disa hoxhallarëve, matrapazë si ju, që janë paguar (ndoshta) mirë nga qarqe turke, arabe apo ku ta dish se nga, të orkestruar nga myftiu Tërnava të bllokojnë rrugën mu në qendër të Prishtinës , për më shumë se një orë, për ta “falur” namazin e së premtes në peshk të diellit, ku temperaturat ishin mbi 30 gradë! Unë atë ditë kam qenë në Prishtinë dhe në atë pikë dite njeriu e ka pasur shumë të vështirë të qëndrojë pesë minuta në atë temperaturë, e lere më të falet në asfaltin përvëlues! Megjithatë në këto kushte “trushpërlarët” shqiptarë myslimanë e falen namazin! Dhe paradoksi është se aty afër kanë qenë 7-8 xhamia të zbrazta! A ishin këta njerëz ” trushpërlarë” Dhe kush qenë ata që u manipuluan dhe po manipolohen kështu në vazhdim? Këta janë disa të rinj që po “jangllatisen” rrugëve të Prishtinës, Tiranës dhe kudo nëpër qytete e fshatra shqiptare me mjekra, pantollona “trefërtalshe” që po paguhen, ndoshta, nga propaganda e juaj!
Po ju o frikacakë analfabetë, a e morët vesh se një i ri në rrugën “Proleteri” vjet u gjet i varur në shtëpinë e tij i ndikuar nga propaganda e juaj fetare, jo nga droga (siç u shprehët ju disa herë, edhe pse fenomene të drogës janë aktuale gjithandej dhe unë jam poashtu kagorikisht edhe kundër drogës , prostitucionit ) se gjoja njeriu duhet të vdesë para se t’i mbushi 17 vjet , se kështu do të shkojë në xhenet! A janë këto fakte për ju që po flisni nga Londra duke ua qarë hallet “bashkëkombasve” tanë!
Në anën tjetër, po nga kjo propagandë fetare e juaja sa të rinj shqiptarë u vranë dhe po vriten përditë në Siri? Rasti i fundit qe i riu nga Krojmiri i Lipjanit, Pajtim Olluri. A janë këto fakte? Ju po thoni se këta janë dëshmorë! Këta nuk mund të quhen dëshmorë. Këta janë viktima të propagandës suaj fetare! Po shihet qartë se kryengritësit, atyre që po u bashkohen edhe këta shqiptarë të mashtruar, nuk po tregojnë se po bëjnë luftë çlirimtare. Të gjithë i kemi parë skenat nga lufta e Sirisë, kur kryengritës të Al-kaidës (ku po rreshtohen edhe “vullnetarët” shqiptarë) i ekzekutonin robërit e luftës! A janë këta çlirimtarë? Prandaj të rinjtë tanë që shkuan në luftë atje nuk duhet të bëhen kriminelë si ata. Mua më vjen shumë keq për viktimat e luftës në Siri, por ju frikacakë analfabetë duhet ta dini dallimin në mes të luftës së Kosovës, e cila ishte çlirimtare, ndaj luftës se Sirisë, që është luftë klasore qytetare, ose luftë sektore fetare!
Ju, pastaj, më keni akuzuar pse unë, në artikullin tim, kam pyetur se ç’bëri Siria për kosovën? Po është e vërtetë se unë kam bërë këtë pyetje. Dhe unë mendoj se kjo pyetje është e drejtë , se Siria ka mund të bëjë diçka për Kosovën . Në mos kurgjë në kohë lufte, bile ajo ka mund ta njohë Kosovën shtet pas shpalljes së pavarësisë, apo jo?. Po ajo as këtë nuk e bëri, sikundër që s’e bënë as shumica e shteteve islamike! Edhe këtu, nëse doni do t’ju sjell fakte, se kush e deshi Kosovën e kush jo. Po ju tregoj se shtetet pjesëmarrëse në luftën e Kosovës ishin shtete besimit të krishterë, apo jo? Ato bënë që Kosova të çlirohej nga sundimi serb. Në anën tjetër , le që shtetet islamike nuk e prishën as “tymin e duhanit” kur kallej Kosova, por edhe sot e gjithë ditën, shumica syresh, ngurrojnë ta njohin siç thamë shtetin e Kosovës ( me prjashtim të disa shteteve arabe që kanë marrëdhënie më të mira me SHBA-të si Turqia, Egjipti, Arabia Saudite, Kuvajti e ndonjë tjetër). Në mbështetje të mendimit tim është edhe deklarata juaj, kur shkruani: “…se çfarë bëri Kosova për vendet anëtare të NATO-s ushtarët e të cilëve erdhën e luftuan e u vranë në Kosovë në mbrojtje të të drejtave njerëzore” Këta ushtarë qenë kryesisht të krishterë. Ku ishte bota islame?
E katërta: Juve o frikacakë analfabetë ju “falenderoj” shumë që më “mësuat” edhe për Sami Frashërin, i cili sipas jush “paska punuar dhe krijuar në oborrin e sulltanit”, po a e dini pse sulltani e burgosi atë? A e dini pse Samiu vitet e fundit të jetës së tij të shkurtër, pra (jetoi vetëm 54 vjet) jetoi në burg shtëpiak? A e dini ju frikacakë analfabetë se edhe si botues i gazetës “Drita” , e pastaj edhe “Dituria” Samiu asnjëherë në shkrimet e tij nuk ka dalë me emër? Ai gjithnjë shkruante ose pa emër, ose me pseudonim. Sikur t’i kishte pasur mirë punët me sulltanin dhe me Perandorinë, ai nuk do t’i botonte shkrimet e tij pa emër, apo jo?! A e dini se veprat në gjuhën shqipe nuk i botoi në Stamboll por në Bukuresht, një nga këto është edhe vepra “Shqipëria ç’ka qenë, ç’është dhe ç’do të bëhet”?
Për ta parë më për së afërmi, se sa , siç thoni ju, “vëllazërit tanë turq (në fe)” i kanë dashur shqiptarët dhe Shqipërinë do ta citoj një deklaratë të vetë Sami Frashërit, i cili duke iu përgjigjur pyetjeve të disa gazetarëve të huaj në Stambol, nëse qeveria osmane do t’i jepte Shqipërisë reformat e premtuara ai, pat thënë: “Porta e Lartë me dashuri e me mirësi nuk të jep gjë kurrë. Ajo do më mirë humbjen e Shqipërisë, e ta ndajë në mes të armiqve që e rrethojnë, se sa t’ua lërë shqiptarëve ta ndreqin e ta lulëzojnë. Prandaj, meqë sulltani me hir s’ka për të na dhënë gjë, shqiptarët duhet t’ia marrin atij me pahir. Ta kërkojmë me fjalë, por gjithmonë duke e mbajtur në dorë pushkën plot. Liria është thelbi i shpirtit dhe i mendjes, aty ku s’ka liri, mendja dhe shpirti thahen, si bima pa ujë”
A më mirë e ka njohur Sami Frashëri Perandorinë Otomane, që ka jetuar aty, apo ju që jetoni ne mes të Londrës dhe bëni pallen e sefasë dhe flisni kuturu! Po a e dini se Turqia, edhe pas shkëputjes nga Perandoria (pas vitit 1908) me xhon turqit ka bërë masakra në shqiptarë hiç më pak se okupuesit e tjerë të mëhershëm bizantinë, romakë, apo të mëvonshëm grekë, serbë, malazezë, bullgarë!
Në anën tjetër, e di mirë se shumë shqiptarë gjatë Perandorisë Otomane kanë pasur pozita të larta në Perandori, si vezirë, pashallarë etj., po duhet ta dini se ata i kanë shërbyer Perandorisë e jo popullit të vet. I rëndësishëm për shqiptarët qe Skënderbeu, që ia zbardhi faqen shqiptarëve dhe Shqipërisë në tërë Evropën. Ishte Skënderbeu, ai që i la “të mirat” e Portës dhe e luftoi atë për një çerek shekulli duke e mbrojtur Shqipërinë. Është ai patriot që disa hoxhallarë të kallëpit tuaj po e shajnë. A është kjo e vërtetë apo jo? Pa më thoni, ju lutem, pse rreth 5 milionë shqiptarëve as sot nuk u lejohet të gëzojnë asnjë të drejtë kombëtare nga shteti turk? Ata shqiptarë qëkur migruan në Turqi qenë të detyruar t’i ndërronin edhe mbiemrat! Turqia as sot nuk lejon asnjë shoqëri kulturore shqiptare. Turqia është vendi ku nuk ka asnjë gazetë shqipe, as shkollë shqipe, asgjë! Ju thoni se Parandoria (më vonë Turqia) ishte mike e shqiptarëve, kurse Sami Frashëri shkruan të kundërtën, duke thënë se:“Mretësi e turkut i vështron shqiptarët si armiqët e saj.” (Sami Frashëri Vepra 4, Prishtinë 1978, f. 26) )
Në këtë kontekst, ju nuk e latë pa e përmendur as Perandorinë Romake, që ka sunduar tokat ilire rreth 1000 vjet dhe trashëgimtaren e saj Italinë. Edhe në Itali, sidomos pas vdekjes së Skënderbeut, ikën shumë shqiptarë. Shteti italian nuk i pengoi arbëreshët të kenë shkolla fillore dhe të mesme, gazeta, të ruajnë dhe kultivojnë kulturën shqiptare. Të kenë edhe universitete! Këtu mund ta shihni ju se cili shtet qe më i mirë dhe tolerant “vëllazërit” turq, apo “armiqtë” italianë?
Për gjendjen e rëndë të shqiptarëve Samiu një pjesë të fajit ia hedh pikërisht fesë. Në përpjekjet e Samiu për bashkim kombëtar dhe me pengesat që ballafaqohej për t’ia arritur këtij qëllimi, ja se si shprehet ai për fenë: “…Meqë feja pengon bashkimin kombëtar dhe me këtë ajo bënë lojën e armikut, atëherë ç’na duhet feja, ta hedhim poshtë! Shqiptari është shqiptar, para se të jetë myslimanë a i krishterë” (Po aty f. 68). Fundja feja për Samiun ishte “besim i njerëzve që e kanë humbur betejën mbi tokë dhe janë dorëzuar para vështirësive të jetës, njeriu vetëm kur mërzitet mbi tokë ngre kryet drejt qiellit; si dhe atyre që s’vlejnë asgjë e kapen pas fesë për të gjetur ngushëllim! (Po aty f. 129)!
Përsa i takon Nënë Terezës, edhe pse ishte një misionare fetare ju duhet ta dini dhe ta pranoni, se ajo i bëri nder të madh kombit shqiptar. Habitem me ju kur thoni se “misioni i Nënë Terezës ishte feja”! Po ajo qe një misionare fetare, po qe shqiptarja e parë që u kurorëzua me çmimin Nobel për paqe. Por këtë çmin nuk e mori se ishte fetare, se fetare ka pasur para saj dhe pas saj me mija e mija, po askush nuk e mori atë çmim. E mori Nënë Tereza për punën e saj humanitare dhe të injorohet nga vetë shqiptarët (lexo nga disa hoxhallarë shqipfolës, se zoti e di se çfarë origjine kanë?) , është turp! Pa më thoni ju frikacakë analfabetë, cili hoxhë (shqiptar) ka marrë ndonjë çmim të tillë, apo të ngjashëm? Asnjë! Pse? Sepse asnjë nuk ka arritë të bëjë aq sa bëri Nënë Tereza!
E pesta: U mundova t’ju kuptoj , po vërtetë nuk munda kurrsesi! Nuk di si ta kuptoj konstatimin tuaj. Citoj: “Ideologjia Personaliteti (po e shkruaj ashtu siç e keni shkruar ju) ei z. Islami reflekton errësirën mesjetare dhe jo qytetërimin evropian dhe kjo kuptohet nga shkrimi i tij i cili është tendencioz(!) dhe cënon harmoninë ndërfetare ndër shqiptarët, që krenohen me këtë vlerë si shenjë e kulturës dhe civilizimit e që ju mungon shumë qytetërimerve të tjera”!!! Më poshtë del edhe shpifja tjetër, citoj: “Ai (fjala është për mua S.I. ) e ka halë në sy fenë islame(!) dhe nuk le fyrje e sharje pa përdorur ndaj Myslimanëve shqiptarë apo bashkësive islame shqiptare(sic!)” Pa hyrë në analizën gjuhësore, që është model se si nuk duhet të shkruhet (e që do ta prek pak më vonë), më duhet të them se shpifje të tilla janë shumë të liga! Unë do t’i kisha lutur të gjithë lexuesit e nderuar që nëse nuk përtojnë mund ta lexojnë artikullin tim këtu: http://tribunashqiptare.net/?p=16112 dhe do ta shohin gënjeshtren lakuriq të këtyre këtyre frikacakëve analfabetë që hedhin gurin e fshehin dorën. Po çfarë fyrje e sharje paskam përdorë ndaj myslimanëve? Me çka mund ta arsyetoni konstatimin se unë e paskam “halë në sy islamizmin”? Për çfarë errësire mejetare po flisni o analfabetë? Po për çfarë harmonie ndërfetare po flisni o hoxhallarë gjakprishur? Po a e dini ju se edhe unë jam një njeri që vij nga një familje me besim mysliman. A s’po ju vjen turp për këto shpifje të paskrupullta që m’i drejtoni mua? Për këto shpifje unë kam të drejtë t’ju hedh në gjyq. Po do të ketë kohë edhe për këtë.
E gjashta: Një “margaritar” tjetër të këtyre hoxharllarëve që fshihen ne dhomat e “Dritës” dhe nuk guxojnë ta qesin kokën jashtë është edhe ky: “Myslimanët hyjnë në luftë me armën më të fuqishme- Dijen dhe Penën. Nëse dija përdoret drejt ajo largon errësirën dhe perhap dritën e dashurisë(!), paqes dhe mirëkuptimit. Në këtë armë betohet edhe Zoti i Madhërishëm dhe filloi zbritjen e Kur’anit…”
Nga njëra anë, a mund të më tregoni , pasi qenkeni shumë të dijshëm se për çfarë dije e keni fjalën ju analfabetë? Po ata jomysliamanët a kanë dije dhe pena? Çfarë shpikje bënë myslimanët e çfarë të krishterët, pra? A ju ka shkuar ndonjëherë mendja t’i krahasoni këto? Çka është kjo lojë fjalësh “Nëse dija përdoret drejt ajo largon errsirën dhe perhapë dritën e dashurisë”? Pastaj a po e kuptoni se Zoti nuk ka kuptim të betohet veten e tij(!) , se ai është vetë Zoti apo jo? Si e shpjegoni pra fjalinë që e keni shkruar vetë ”Në këtë armë betohet edhe Zoti i Madhërishëm”! Ju vetë po e kundërshtoni veten! Diçka të tillë nuk kam lexuar askund! Kështu dinë të ”shpjegojnë” vetëm hoxhallarët analfabetë të “Dritës” që jetojnë në qendër të Londrës!
E shtata: Këta hoxhallarë horra, dinë të shpifin edhe të tjera marifete! Po citoj: “z. Islami edhe pse ka deklaruar(!) se qe 15 vjet jeton e punon në Mbretërine e Bashkuar duket se nuk ka arritur të përfitojë asgjë nga kultura e një vendi shumëkulturor” (Ju paskeni përfituar shumë nga kultura e ketij vendi!) E para, në artikullin që po i referoheni ju myslimanë të devotshëm, unë nuk kam deklaruar asgjë, se qe sa vjet jam , apo nuk jam në MB. E vërteta është se unë jam në MB qe 18 vjet, por ju horra e pakeni marrë këtë detaj të biografisë sime në internet, të përditësuar tre vjet më parë. Dhe tjetra: “Z. Islami ka deklaruar (sic) se ka qenë mësues i gjuhës shqipe në Kosovë. Si ka mundësi pra të mos e dijë se në periudhën 1990-99 ishte pikërisht Bashkësia Islame ajo që vuri në funksion xhamitë, për të ndihmuar shkollimin shqip, duke i shndërruar xhamitë në shkolla të gjuhës shqipe” Unë jam mësues, por në artikullin tim, poashtu , nuk kam deklaruar se “kam qenë mësues”. Po si nuk ju vjen turp ore të rreni ashtu? Pse nuk thoni o frikacakë analfabetë që këto të dhëna i keni marrë nga interneti? Turp të keni!
Nëse dikush nga lexuesit e nderuar e gjen në artikullin tim “Propaganda fetare dhe xhamiat (e reja ) në trevat shqiptare”, se unë kam deklaruar që jetoj në Londër qe 15 vjet, ose se kam deklaruar se kam qenë mësuese i gjuhës shqipe, unë do t’i shpërblejë me çfarë të duan!
Përsa i takon asaj se në periudhën 1990 deri më 1998, dihet se regjimi serb i uzurpoi të gjitha shkollat tona, por xhamiat jo! Po ju pys përse asnjë xhami nuk e mbylli? Serbia i mbylli madje edhe qerdhet, po xhamiat jo! Unë e di shumë si ka funksionuar shkolla shqipe në atë periudhë. Mua po më duket se këto “të dhëna“ ju i paskeni “ me të dëgjuar”! Njerëz patriotë kanë lëshuar shtëpitë e tyre dhe i kanë bërë shkolla që quheshin “shtëpitë shkolla”.Për xhamitë shkolla këto janë shpikje tuaja!
E teta: Reagimi juaj vlon nga gabimet të ndryshme, nga ato gjuhësore deri tea to logjike. Në bazë të gabimeve del se se artikulli është shkruar nga shumë hoxhallarë. Dhe mu në bazë të gabimeve del se ju të gjithë qenkeni analfabetë! Shkrimi i juaj është aq i keq sa vende-vende as nuk mund të kuptohet se çfarë keni dashur të thoni. Sa për ilustrim po ju përkujtoj juve dhe lexuesin e nderuar se në çfarë gjendje të mjeruar intelektuale janë hoxhallarët e “Dritës”. Citoj: “Armiqët e ideologjive ekstremiste , antiislame, vazhdojnë të shtegtojnë si llava vullkanike e cila shkatërron çdo gjë që gjen përpara”!? Unë kam lexuar shumë, por kurrë nuk kam hasur në një krahasim të tillë siç e bëjnë këta hoxhallarë “te shkolluar”, që sipas tyre “ shpesh janë më të arsimuar se laikët”! Se llava po “shtegtoka” këtë e mësova prej hoxhallarëve të “Dritës”. A e dini ju analfabetë çfarë domethënë fjala “shtegtoj, shtegtim”? Po ju tregoj se kjo fjalë e ka kuptimin “udhëtoj, udhëtim” shtegton nga një vend në një vend tjetër, udhton. Kurse llava vullkanike vërshon e jo shtegton (llava nuk mund të “udhëtojë” herë në një vend e herë në vend tjetër!) ! Ajo aty ku shpërthen vërshon tatëpjetë, apo jo?
Një tjetër fjali. Citoj: Faktet historike janë më kokëforta se dëshira e tyrejuaj për ta shuar dritën e së vërtetës”!? Këtë po ia lë lexuesit ta komentojë dhe të shohë se si shkruajnë shqip hoxhallarët e “Dritës”! Nuk besoj se e dinë edhe ata vetë se çfarë kanë dashur të thonë!.
Ja edhe një fjali tjetër e bërë sallatë. Citoj: “Nuk u vramë jo nga turtqit e as nga, jo nga arabët por nga serbët, për faktin se jemi myslimanë dhe jemi shqiptarë” (!?)
Po citoj edhe një fjali tjetër të këtyre hoxhallarëve të “ditur” që më kanë dhënë mua “ders” për shkollimin. Citoj: “A mos vallë këta sekularistë/laicistëju nuk e ndjejnëni(!) vehten shqiptarë por të amerikanizuar(!), anglizuar, gjermanizuar etj etj dhe pandehnin (kush ?) se të gjithë janë të një niveli me toju(!?), të zhveshur nga ndjenjat dhe identiteti kombëtar!” Jam i bindur se as këta hoxhallarë vetë nuk dinë se çka kanë dashur të thonë. Lexuesi i nderuar le të bindet vetë!
Një tjetër fjali: A nuk e shohinihni llumin ku kanëeni rënë !!
Një “margaritar” tjetër i hoxhallarëve të “Dritës”, citoj: “Elokuenca e z. Islamijuaj duke derdhur vrer kundër Islamit(!) dhe myslimaneve, ju i ze sytë (!) dhe nuk mund t’a dot dritën e diellit, sepse drita e diellit dhe e vërteta eju verbon”!!!!
Në fjalinë vijuese shohim këtë konstrukt: “A mos e ka fjalën (!) për 95% shqiptarëttë (!) popullsisë Myslimanë (?), të popullsisëe të Kosovës(!?)” Hajde e merre vesh se çka kanë dashur të thonë këta të mjerë!
Një tjetër “fjali” pa logjikë: “Kurrë të mos mendojnë këta ekstremistë antikombëtarëni se me shkrime apo mendime(!) të llojit sekular/laik, do të arrijëni t’iua imponojëni hoxhallarëve të ligjërojnë nëpër xhami(!) sipas dëshirave të tyreuaja” Pastaj: “E vërteta dhe drita e Kur’anit është më e nditshme se helmi që kërkojnëni të mbillnin (!) këtu shqiptarju zotërinj”!!!??? Po çfarë lidhje paska “ e vërteta dhe drita e Kur’anit” të krahasohet me “helmin” . Këtë mbetet të na e sqarojë hoxha i “Dritës”, që rrin në terr!. Pa le që pataj të analizohet pjesa tjetër e fjalisë: “që kërkojnëni(!) të mbillnin (kush po kërkon këtu të mbjell?) ?) këtu shqiptarju zotërinj!
Kësi sallatash ka plot në reagimin e këtyre hoxhallarëve “të ditur”. Këto dhe fjali tjera si këto janë fjali që tregojnë për nivelin e shkrimit “shqip” të hoxhallarëve të “Dritës”, ose të “mësuesve” të Dritës, siç po pretendojnë ta heqin veten. Vetëm nga këta shembuj, që i përmendëm këtu , lexuesi ka rastin të shohë se çfarë “mësuesish” janë këta! Duke mos hyrë t’i analizoj gabimet tjera, më duhet vetëm t’u përkujtoj se në “reagimin” e tyre kanë mbi 200 gabime të tjera gjuhësore!
Në përmbyllje do t’ua përkujtoj një thënie popullore , e cila thotë: Kurrë mos hy aty ku nuk mund të dalësh! Fatkeqësisht autorët e reagimit kanë ra në hendek. Dhe duke menduar se do të dalin lehtë, atyre u ndodhi e kundërta! Përunduan në fund të pusit! Argumentet që ua solla e dëshmojnë këtë!
|
Vërëjtje: Artikujt e botuar në albaniapress.com nuk shprehin domosdoshmërisht mendimet e stafit moderues! |
| Vlerësimi juaj për lajmin |
 |
|
|
|
|
| I keq |
I dobët |
I mirë |
Shumë i mirë |
I mrekullueshëm |
|
|
|
|
|
|
|
| |
|
| Është vlerësuar nga 43 vizitorë |
| Lexuar:
1,128 herë
|
|
|
|
|
|
|
