Kështu po e nisi tregimin për urimin e festave me shumë kuptime: “Gëzuar festat e fundvitit”, ose “Organizata Punuese… Ju uron Festat e Fundvitit!”, në vend se të thuhet konkretisht “Urime Krishtlindjet! dhe Gëzuar Vitin e Ri!”, urime që zakonisht shkruhen anglisht dhe në gjuhët e ndryshme në Europë. Në anën tjetër “Urime festat e fundvitit”, sipas ndërtimit sintaksor është fjali mungesore dhe e paqartë për qytetarët, sepse mungojnë dy urime: e para fetare dhe e dyta tradicionale. Festa tradicionale e Vitit të Ri është festë ndërkombëtare që pa dallime fetare e besimi festohet në mbarë botën, po bie viktimë për shkak të festës fetare të krishtlindjeve që festohet më 24 dhe 25 dhjetor.
Pikërisht në televizionin suedez nuk figuron togfjalëshi me shumë kuptime “Festat e Fundvitit“, qysh në fillim të dhjetorit urojnë dy festat edhe Krishtlindjet, edhe Vitin e Ri, mirëpo fill pas përfundimit të kërshëndellave urojnë vetëm Vitin e Ri. Mua aspak nuk do të më vinte mirë po të më uronte ndonjë mik “Gëzuar Festat e Fundvitit!”, në vend se të urohet “Gëzuar Vitin e Ri!”, sidomos pas kalimit të kremtes së kërshëndellave. Kjo do të ishte sikur qytetarit t'i urohen rrobat e reja, duke përfshirë setrën, pantallonat dhe këmishën, gjë që nuk është aspak etike. Sido që të jetë, festa e krishtlindjeve është festë krishtere në fund të vitit, por edhe e vetmja festë fetare në muajin dhjetor, kurse festa ndërkombëtare e Vitit të Ri gjendet në fillim të vitit pasues, apo ditën e parë e të dytë dth. më 1 e 2 janar, jo më 31 dhjetor, ashtu siç është 1 e 2 maj Dita e Klasës Punëtore, për të cilën nuk thuhet Festa Punëtore në fund të muajit prill, por në fillim të muajit maj. Prandaj për nga ditët e festimit aspak nuk kanë ndryshim Festa e Vitit të Ri dhe Festa e Një Majit. Tekembramja, më 31 dhjetor në mbarë botën është ditë pune, të gjithë qytetarët vlojnë për furnizim shtëpiak, kurse të nesërmen dhe të pasnesërmen (më 1 e 2 janar) është ditë feste, prandaj të gjitha institucionet, fabrikat dhe shitoret mbyllen, kurse numri i autobusëve për bartjen e udhëtarëve zvogëlohet. Përveç kësaj, fishekzaret e shumëngjyrta festive shpërthejnë pikërisht kur akrepat e orës përputhen në mesnatë. Prandaj, atë çka nuk e kanë bërë popujt tjerë të kulturuar në Europë e në botë, të mos e bëjnë as shtypi e televizioni shqiptar, sepse edhe ashtu shqiptarët janë në tri konfeksione fetare myslimane, katolike dhe ortodokse.
Në anën tjetër, urime për festat e nëntorit e ka arsyen, sepse ditët e çlirimit të trojeve shqiptare gjenden pikërisht në muajin nëntor dhe përfundojnë më 28 e 29 nëntor, që është Dita e Flamurit Kombëtar dhe Dita e Çlirimit të Shqipërisë. Megjithatë edhe në këtë rast, sipas traditës dhe kulturës së gjuhës letrare, parapëlqehet të pëmenden festat kombëtare, edhe Dita e Flamurit Kombëtar edhe Dita e Çlirimit të Shqipërisë, sepse për të dyja rastet është derdhur gjak: e para për Pavarësine Kombëtare të Shqipërisë nga pushtuesi turk, dhe e dyta nga fashizmi gjerman e italian. Pikërisht sot mbarë populli shqiptar po e feston Ditën e Flamurit Kombëtar të ngritur në Vlorë më 28 Nëntor 1912, megjithatë shqiptarët e mbetur jashtë Shqipërisë administrative ende vazhdojnë të luftojnë për çlirimin dhe bashkimin e të gjitha trojeve shqiptare në Shqipërinë Natyrale. Dihet, Flamuri Kombëtar Shqiptar me shqiponjën dykrenore nuk është flamur i pushtimit të tokave të huaja, por është flamur i çlirimit dhe bashkimit të tokave shqiptare të pushtuar nga fqinjët tanë sllavë e grek.
Suedi, Janar 2015
|