(PAVARËSIA NË RREZIK, KOSOVA THËRRET)
Këmbëngulja e Fuqive të Mëdha për ta themeluar një Gjykatën Speciale, e cila do të dënonte përpjekjet, luftën dhe flijimet e UÇK-së dhe të kombit tonë për çlirimin e Kosovës shqiptare, ka ngjallur kudo ndër shqiptarë indinjatë dhe kundërshtim të vendosur. Gjykata Speciale është tërësisht arbitrare, ilegale dhe jolegjitime. Krijimin e kësaj Gjykate Speciale e ka inicuar dhe sponzorizuar Serbia neofashiste me miqtë e saj, e cila është përgjegjëse për gjenocidin dhe holokaustin në Kosovë, në Bosnjë e në Kroaci...!!!
Themelimi i saj nuk ka mbështetje në asnjë dokument dhe në asnjë konvente ndërkombëtare, nuk ka mbështetje as në kartën e OKB-së dhe në asnjë organizatë tjetër ndërkombëtare... Prandaj, Fuqitë e Mëdha, të cilat po këmbëngulin për themelimin e saj, po bëjnë presion, po bëjnë shantazh, po kërcënojnë dhe po kërkojnë nga institucionet e Republikës së Kosovës dhe nga populli i Kosovës që t'i japin legalitet dhe legjitimitet kësaj Gjykate absurd, arrogante dhe antishqiptare me votën e tyre në Kuvendin e Republikës...!!!
Gjykata Speciale do të ishte një shtet mbi shtetin e Kosovës! Republika e Kosovës me sovranitet të cunguar, me themelimin e kësaj Gjykate Speciale do ta humbiste edhe pavarësinë dhe lirinë e saj të fituar... Asnjë deputet, asnjë qeveritar dhe asnjë shqiptar (qytetar i Republikës) nuk ka mandat të votojë kundër lirisë dhe pavarësisë së Kosovës, nuk ka mandat ta doëzoj lirinë dhe pavarësinë e Kosovës... Përkundrazi, çdo qytetar i Republikës dhe çdo zyrtar e institucion i saj ka detyrim kushtetues, politik, moral e kombëtar ta mbrojë me të gjitha mjetet dhe mënyrat lirinë dhe pavarësinë e Kosovës, edhe me jetën e tij...
Themelimi i kësaj Gjykate dhe votimi i ligjit për të në Kuvendin e Republikës së Kosovës po kundërshtohet fuqishëm edhe nga shoqatat e dalura nga lufta e UÇK-së dhe e kombit shqiptar. Këto shoqata për datën 17 qershor kanë thirrë protestë në Prishtinë... Ato kanë ftuar të gjitha partitë politike (pozitë e opozitë), të gjitha shoqatat joqeveritare e qeveritare dhe të gjithë qytetarët e Republikës së Kosovës (shqiptarë e joshqiptarë) që t'u bashkohen në këtë protestë...
Në një takim me shoqatat e luftës së Ushtrisë Çlirimtare të Kosovës, opozita (VV-AAK-NISMA) u dha përkrahje atyre për kundërshtimin e Gjykatës Speciale dhe mori përsipër që t'i bashkohet protestës më 17 qershor, në orën 12, në Prishtinë... Ftojmë të gjithë qytetarët pa dallim ideje, partie, krahine, feje e kombësie që të qëndrojnë të bashkuar për mbrojtjen e lirisë dhe të pavarësisë së Kosovës, të bashkuar në protesta dhe të bashkuar në kundërshtimin e kësaj Gjykate me të gjitha mjetet dhe format...! Uniteti i institucioneve të Republikës, i partive politike, i shoqatave dhe i popullit për mbrojtjen e lirisë dhe të pavarësisë (kundër Gjykatës kundër çdo misioni a tendence që kufizon ose suprimon sovranitetin, lirinë dhe pavarësinë e Republikës) është i domosdoshëm... Pavarësia në rrezik, Kosova thërret!
Kosova dhe populli i saj liridashës ftonë posaçërisht Tiranën tonë, por edhe miqtë tanë (amerikanët, anglezët, gjermanët, francezët...), të gjitha shtetet (të mëdha a të vogla qofshin) dhe të gjithë popujt liridashës, paqedashës dhe demokratik që ta mbështesin Kosovën dhe popullin e saj në rrugën e ndërtimit të pavarësisë, sovranitetit, lirisë, demokracisë, zhvillimit ekonomik dhe pavarësimit të plotë (shkëputjes) nga Serbia!
|