|
E enjtja e 22 korrikut për Kosovën dhe shqiptarët rreth saj, s’ka se si të mos përmendet, si një datë karakteristike për ardhmërinë perspektive të saj dhe të rajonit në përgjithësi.
Gjykata Ndërkombëtare e Drejtësisë në Hagë, mori vendimin pozitiv për shpalljen e pavarësisë së Kosovës e cila nuk shkelë të drejtën ndërkombëtare dhe është në përputhje me të drejtën ndërkombëtare të krijimit të shteteve.
Shkruan: Nexhmedin Saqipi, Bujanoc
Një vendim i tillë i GJND-së është një shuplakë e nxehtë ndaj padisë së Serbisë për kinse shpalljen e njëanshme të pavarësisë së Kosovës.
Ky vendim i GJND-së do të ndryshoj qasjen ndaj Kosovës. Beogradi nuk do të harxhoj energji vetëm rreth pengesave për njohjen e mëtejme të Kosovës si shtet, por do të angazhohet rreth ndarjes së saj.
Pas këtij vendimi historik, Beogradi do të luaj në kartën më mirë pak se hiq, duke u përpjekur që të shkëpus një pjesë në veri për të lëshuar pe pak në jugun e saj të populluar me shumicë shqiptare.
Por, se si do të zhvillohen negociatat mes Prishtinës dhe Beogradit për çështje praktike, varet nga lëvizjet politike mes dy shteteve, të cilat deri dje janë shikuar përmes grykës së pushkës e vazhdojnë edhe më tej të akuzojnë njëra-tjetrën për provokime përgjatë zonave kufitare, të cilat në të kaluarën kanë qenë administrative e tashti shtetërore.
Emocionet
Shqiptarët e serbët si dy popuj fqinj me një të kaluar të hidhur janë të përfshirë nga emocionet. Nostalgjia për të kaluarën dhe entuziazmi për të ardhmen shpesh i bënë ata të shkelin vijën e vetëpërmbajtjes.
Shqiptarët kanë arsye të gëzohen dhe t’i bien daulleve, meqë e drejta e tyre politike dhe historike po vuloset me të drejtën ndërkombëtare për mëvetësi, ndërsa serbët kanë të drejtë të hidhërohen, por nuk kanë të drejtë t’i bllokojnë proceset demokratike në rrugën e integrimeve euroatlantike.
Në ditën e shpalljes së vendimit nga GJND-ja shqiptarët i përgatitnin daullet për ta festuar të drejtën historike, ndërsa serbët i binin këmbanave të alarmit dhe luteshin te Zoti për ta realizuar kërkesën e tyre kundër shpalljes së njëanshme të Kosovës Republikë!
Revanshi
Beogradi i zhgënjyer nga këto procese ndërkombëtare pozitive në favor të Prishtinës, do të mundohet të prodhoj destabilitet jo vetëm në veri të Kosovës, por edhe në jugun e saj.
Kutia e Pandorës do të hapet. S’ka më temë tabu. Ma jep një pjesë në veri, ta jap një në jug. Kosova Lindore e rrethuar me policë, xhandarë dhe ushtarë serbë përdoret nga Beogradi si monedhë për kusuritje. Këtë kartë Beogradi do ta luaj në momentin kur t’i ngushtohen rrathët.
Nëse nuk ndodh kështu, mund të vijnë telashe dhe sherre të reja të papritura për të dyja palët. Do të krijohet një mosdurim serb në veri dhe një mosdurim shqiptar në lindje të Kosovës.
Revanshi serb në Kosovën Lindore do të jetë në fokus të presioneve të reja. Serbët do të hakmerren për atë që po e marrin si shpagim nga faktorët ndërkombëtar. Shqiptarët duhet sa më shpejt ta unifikojnë potencialit politik në luftë për ta mbrojtur bërthamën etnike në këto hapësira. Nëse vazhdojnë të përçahen dhe të deziorentohen vështirë se mund t’i përballojnë lëkundjeve nga vendi në vend.
Reciprociteti
Çka kërkojnë serbët e Kosovës, do të kërkojnë edhe shqiptarët e Kosovës Lindore. Kështu dëgjohen zërat në Preshevë, madje edhe në Prishtinë e Tiranë, por gjërat dallojnë në praktikë.
Derisa serbët e Kosovës të mbështetur fuqimisht nga Beogradi, po i bëjnë të gjitha përgatitjet e mundshme për ta avancuar statusin e tyre politik, shqiptarët e Kosovës Lindore në mungesë të përkrahjes së dy shteteve: Shqipërisë dhe Kosovës, kanë rënë në gjumin veror. Ata të lodhur nga vapa e korrikut dhe të molisur nga përçarjet ndërpartiake si duket në plan të parë e kanë pushtetin, interesin, tenderët e privilegjet, se sa projektet kombëtare.
Shqiptarët e Kosovës Lindore duhet t’i lënë mënjanë inatet politike, përçarjet dhe shantazhet për t’u njësuar rreth një trupi të përbashkët qoftë Këshill Integrues apo ndonjë formë tjetër e organizimit, në mënyrë që të mbrohen nga çorientimi total i korpusit politik. Vetëm të bashkuar ata mund të bëjnë diçka në të mirë të çështjes kombëtare, në të mirë të ruajtjes së bërthamës etnike në këto hapësira të Kosovës Lindore. Tjetër alternativë nuk ka.
(Autori është kryetar i Partisë Demokratike Kombëtare nga Kosova Lindore)
Kontakti: nexhas@hotmail.com
24. 07. 2010
|
