|
Serbia ia ka dorëzuar sot Asamblesë së Përgjithshme të OKB-së tekstin e rezolutës së re për Kosovën, me të cilën sipas medieve serbe, nuk përmenden negociatat për statusin, por theksohet se secesioni është mënyrë e papranueshme për të fituar Kosova sovranitetin territorial.
Me rezolutë, Asamblesë i propozohet konkluzioni rreth mendimit këshillëdhënës të GJND-së, ka njoftuar Ministria e Punëve të Jashtme të Serbisë. Kjo ministri bën të ditur po ashtu se ministri Vuk Jeremic tashmë ka udhëtuar për në New York, për të biseduar rreth Kosovës me sekretarin e Përgjithshëm të KB, Ban Ki Moon.
“Duke pasur parasysh faktin se Gjykata Ndërkombëtare e Drejtësisë nuk ka konfirmuar të drejtën e shqiptarëve të Kosovës për shkëputje nga Serbia, në Rezolutë theksohet qartë se secesioni i njëanshëm është mënyrë e papranueshme për zgjidhjen e çështjeve territoriale”, thuhet në komunikatë.
Po ashtu, sipas kësaj komunikate, Rezoluta e Serbisë përmban thirrje që përmes dialogut të arrihet një zgjidhje e pranueshme reciprokisht për të gjitha çështjet e hapura.
“Rezoluta është dorëzuar pasi janë bërë konsultime me një rreth të gjerë faktorësh ndërkombëtarë, duke përfshirë edhe të gjitha vendet anëtare të Këshillit të Sigurimit”.
|
