| PËRMBYLLJA E MBIKËQYRJES SË PAVARËSISË SË KOSOVËS ËSHTË GËNJESHTËR |
| Publikuar më 31 janar, 2012 në orën 01:40 ( ) |
Abdullah Prapashtica | Opinion | |
|
|
|
PARASHIHET QË PAS “MBIKËQYRJES NDËRKOMBËTARE” TË EULEX-it TË ViJË MBIKËQYRJA E BE DHE NATO-s
PËRMBYLLJA E MBIKËQYRJES SË PAVARËSISËS SË KOSOVËS ËSHTË GËNJESHTËR
Me zë të ulët nuk mund t´i thirret atij që gjendet në gjumë të thellë në një shtëpi të cilën e ka marrë flaka. Ne si popull po jetojmë në kohëra të ashpra, po përjetojmë dhimbje të forta, prandaj nuk mund të flasim me fjalë të urta e të buta për fatkeqësinë në të cilën po na fundosin qeveritarët e korruptuar. Por, edhe në fatkeqësitë më të rënda duhet të ruhet qetësia, sepse vetëm me mendje të kthjellë gjendet rrugëdalja nga çdo situatë. Para së gjithash duhet bërë vlerësimi i saktë i situatës konkrete. Pastaj duhet vlerësuar raportin e forcave dhe nga kjo edhe kahjet e daljes nga kjo situatë.
CILA ËSHTË GJENDJA FAKTIKE JURDIKE?
Para se të hyjmë në temë, të shohim se çka thotë Karta e OKB në
- kapitullin e I mbi VETËVENDOSJEN E POPUJVE dhe çka thotë në
- Kapitullin e XI mbi territoret shtetërore PA VETË-qeverisje!
- Çka thotë Rezoluta e OKB 1244,
- çka thotë marrëveshja e Rambujesë,
- çka thotë Plani i Ahtisarit dhe sa
janë ato në përputhje me parimin e të drejtës së popujve në vetëvendosje, pavarësi dhe barazi me popujt tjerë.
Vet Këshilli i Sigurimit të OKB me Rezolutën 1244 vjen në kundërshtim me Kapitullin e I Kartës së OKB - së pse aty thuhet: “... kërkohet që statusi përfundimtar i Kosovës të arrihet sipas “MARRËVESHJES SË RAMBUJESË përmes autonomisë substanciale të Kosovës nën sovranitetin e Beogradit…”! Aktualisht në Kosovë UNMIK-u, EULEX-i, KOR-i, OSBE-a dhe BE-ja veprojnë sipas Rezolutës së OKB 1244!
Plani i Ahtisarit shkon një hap më tutje në dëmin e Popullit Shqiptar, sepse sipas Ahtisarit, Kosovës si territor i mohohet identiteti nacional shqiptar, dhe Kosova shpallet tokë “multietnike”. Me këtë Populli Shqiptar i Kosovës shpronësohet nga territori i vet etnik dhe njëkohësisht atij i mohohet edhe vet identiteti nacional shqiptar, duke i dhanë një identitet të falsifikuar të ashtuquajtur “ të një komuniteti kosovar”. Pra, Populli Shqiptar i Kosovës nuk njihet as si komb, as si popull (si pjese e një kombi), as si pakicë nacionale as minoritet dhe as si grup etnik i formuar apo i pa formuar me kulturë identifikuese. Nocioni “komunitet” mund të përdoret nga grupet sportive e deri te hordatë barbare.
Këshilli i Sigurimit të OKB, për mos me marrë përgjegjësi juridike, e hodhi poshtë Planin e Ahtisarit, sepse ai përmban në vete elemente gjenocidi ndaj kombit shqiptar. Por, e toleroi atë duke e bartur përgjegjësinë e vet te BE dhe Brukseli, të cilët qëndrojnë pas këtij plani gjenocidal i cili synon shuarjen e kombit shqiptar në Kosovë e më gjerë.
Për lexuesit, unë veçova disa pjesë të Kartës se OKB dhe te rezolutës së OKB që mbështeten në Marrëveshjen e Rambujesë dhe të cilat i thellon për se mbrapshti Plani i Ahtisarit. Ata lexues që duan t'u shkojnë këtyre gjurmëve antishqiptare deri ne fund, munden edhe vet të lexojnë në internet në gjuhen shqipe, Kartën e OKB, Rezolutën 1244, Marrëveshjen e Rambujesë dhe Planin e Ahtisarit, me pa vet se çfarë komploti është kurdisur për zhdukjen e kombit tonë.
DYFTYRËSIA DHE PAFTYRËSIA E FUQIVE TË VJETRA TË EVROPËS DHE E POLITIKANËVE TË KORRUPTUAR VENDORË
Të themi së pari se hipokrizia brirë nuk ka! Në Kosovë, të tjerët pa lejen e Kosovës hynë në tokat tona me tanke, ata që i kërkojnë vizat prej shqiptarëve. Derisa Republikën e Kosovës e njohin si shtet 86 shtete, edhe pas vendimit të Gjykatës Ndërkombëtare, pavarësinë e saj nuk e njohin as OKB, as UNMIK-u as EULEX-i, as KFOR-i, as OSBE e BE. Ndërsa shtet anëtare të tyre e njohin “pavarësinë” e saj! Kosova është shndërruar në një Llogor Koncentrimi të vizave të BE, në një shtet të kolonizuar i cili shërben si laborator për eksperimentime e për shpëlarjen e të gjitha ndyrësirave të mundshme, ku Sovraniteti i Republikës së Kosovës hiqen nga tekstet juridike dhe kalon në fusnota, ndërsa kufijtë e saj shndërrohen “në vend kalime” që kanë kuptimin e stazave shëtitore. Por, para se të vazhdojmë zbërthimin e këtyre makinacioneve mafioze, të shohim se çka thonë dokumentet në të cilat thirren vet ata.
“...Kapitulli I: Qëllimet dhe parimet
Neni 1
Kombet e Bashkuara marrin përsipër:
1. - të ruajnë paqen botërore dhe sigurinë ndërkombëtare dhe, për këtë qëllim, të marrin masa kolektive të efektshme për të parandaluar dhe mënjanuar kërcënimet e paqes, për të mposhtur veprimet mësymëse dhe shkeljet e tjera të paqes, si dhe për të zgjidhur me mjete paqësore sipas parimeve të drejtësisë dhe të drejtës ndërkombëtare konflikte ndërkombëtare apo situata, që do të mund të çonin në shkelje të paqes;
2. - të zhvillojnë marrëdhënie miqësore mes kombeve, të cilat bazohen në parimet e barazisë dhe TË VETËVENDOSJES SË POPUJVE si dhe të marrin masa të tjera të përshtatshme për konsolidimin e paqes;
3. - të ngrenë në këmbë një bashkëpunim ndërkombëtar për të zgjidhur probleme ndërkombëtare të natyrës ekonomike, sociale, kulturore dhe humanitare si dhe për të mbështetur dhe forcuar respektimin e të drejtave dhe lirive themelore të njeriut për të gjithë, pa dallim race, seksi, gjuhe apo besimi fetar;
4. - të jenë qendra, në të cilën koordinohen me njëra-tjetrën përpjekjet e kombeve për të realizuar këto qëllime të përbashkëta ...”
Kosova nga viti 1999 nga ana e OKB trajtohet jo sipas kapitullit të I por sipas kapitullit të XI ku thuhet:
“...Kapitulli XI:
Deklaratë mbi territoret shtetërore PA VETËQEVERISJE
Neni 73
Anëtarët e Kombeve të Bashkuara, që kanë apo marrin përsipër përgjegjësinë për administrimin e territoreve shtetërore, popujt e të cilave nuk kanë arritur ende vetëqeverisjen e plotë, njohin parimin, sipas të cilit interesat e banorëve të këtyre territoreve shtetërore kanë përparësi; ata marrin përsipër si një detyrë të shenjtë detyrimin, që, në kuadër të sistemit të paqes botërore dhe sigurisë ndërkombëtare, ngritur përmes kësaj Karte, të mbështesin maksimalisht të mirën e këtyre banorëve. Për këtë qëllim ata marrin përsipër;
a) të garantojnë progresin politik, ekonomik, social dhe arsimor, trajtimin e drejtë dhe mbrojtjen e këtyre popujve nga abuzimet duke treguar respektin e duhur përkundrejt kulturës së tyre;
b) të zhvillojnë vetëqeverisjen, të marrin në konsideratë, sikurse duhet synimet politike të këtyre popujve dhe t’i mbështesin ata gjatë zhvillimit progresiv të institucioneve të tyre të lira politike, dhe kjo në përputhje me raportet e veçanta të çdo territori shtetëror, të popullsisë së tij dhe të nivelit përkatës të zhvillimit;
c) të konsolidojnë paqen botërore dhe sigurinë ndërkombëtare;
d) të nxisin masat për ndërtim dhe zhvillim, të mbështesin veprimtarinë kërkimore si dhe të bashkëpunojnë me njëri tjetrin, e në rast se duhet edhe me organizatat ndërkombëtare të specialitetit, në mënyrë që të realizojnë kështu qëllimet sociale, ekonomike dhe shkencore përcaktuar me këtë nen;
e) t’i përcjellë rregullisht për njoftim Sekretarit të Përgjithshëm, duke respektuar kufizimet, që marrin në konsideratë sigurinë dhe kushtetutën, informacione statistikore dhe informacione të tjera të natyrës teknike në lidhje me sistemin ekonomik, social dhe arsimor në territoret shtetërore, që nuk përcaktohen në kapitujt XII dhe XIII, territore këto për të cilat ata mbajnë përgjegjësi.
Lajmi i 25 korrikut 2011 ishte një befasi e këndshme, që doli farsë e hidhur!
Kur me 25 korrik 2011 kryeministri e shkarkoi Reshat Maliqin nga detyra e Drejtorit të Policisë, dhe pa e emëruar Drejtorin e ri, e nisi Njësinë Speciale për në kufirin aktual verior të Kosovës, dhe unë bëra një shkrim me titullin: “KTHESA POZITIVE E HASHIM THAQIT, FARSË APO RELAITET?” Shkrimin tim e fillova me këto fjali:
“...Lajmi i 25 korrikut 2011 ishte një befasi e këndshme! E them këtë sepse as një herë nuk kam pas as do të kem as dilema e as lëkundje për të përkrahur publikisht çdo iniciativë përparimtare të kujtdo qoftë, sikur që, po ashtu do të kundërshtoj publikisht çdo veprim negativ, që mund të dëmtojë, nga kush do qoftë e në çfarëdo forme interesat e Kombit dhe Atdheut tim...”! Por, për fatkeqësinë time dhe të gjithë atyre që i besuan këtij veprimi të vonuar shtetëror, kjo doli vetëm një farsë e zakonshme sa për mashtrim optik të opinionit, që kushtoi, kot, një jetë njeriu. Të merremi vesh! Nuk do të ishin shumë humbja e disa qindra njerëzve në dy anët, sikur çështja e veriut të merrte njëherë e mirë një epilog pozitiv. Kështu si është tani e 12 vite edhe ashtu na u vranë disa qindra shqiptarë nga dora çetnike dhe për këtë Beogradi nuk po jep përgjegjësi, por nga Brukseli po shpërblehet me koncesione të reja në dëmin e Kosovës. Prandaj humbja e një jete njeriu pa asnjë kundër vlerë është humbje tepër e madhe.
Kur akoma pa u tharë dheu mbi varrin e Oficerit të Policisë Enver Zymberit, kjo qeveri vazhdoi negociatat me Serbinë në Bruksel dhe u pa se 25 korriku 2011 ishte farsë për mbulimin e koncesioneve tjera në kurrizin e Kosovës në favorin e Serbisë në drejtim të kthimit te “Marrëveshja e Rambujesë”, me të cilën (GNS) Grupi për Negociata me Serbinë pranoi sovranitetin e Serbisë mbi Kosovën, me kusht që pas tri viteve të mbahet referendumi për vetëvendosje! Rezoluta e OKB 1244 po ashtu e pranoi sovranitetin e Serbisë mbi Kosovën. Referendumi nuk u mbaj kurrë por as “Marrëveshja e Rambujesë”, nuk u shfuqizua kurrë. Edhe pse 86 shtete e kanë njohur “pavarësinë” e Kosovës, asnjë shtet i vetëm nuk e njeh të drejtën e Kosovës në vetëvendosje. Ndërsa qeveritarët tanë vazhdojnë ta mbajnë popullin nën hipnozën e mashtrimeve se çdo gjë është rregull, neve po na përsëritet historia e dhimbshme e dyndjeve të mëdha jashtë vatrave stërgjyshore e jashtë atdheut. Tani jemi sërish në pragun e dyndjeve të mëdha të programuara nga boshti Athinë –Beograd- Moskë - Bruksel, për ndryshimin e strukturës nacionale të Kosovës. Për 12 vite Kosova u shndërrua në një Aushvic të vizave të BE. U shkatërrua infrastruktura ekonomike e sociale dhe u përgatit tereni psikologjik për braktisjen masive të Kosovës nga rinia e saj.
Kosova e ka prioritet bashkimin e vet me shtetin amë Shqipërinë, e jo anëtarësimin në OKB, në BE e NATO!
Kur UNMIK-ut i u çjerr maska koloniale, ata ia ndryshuan emrin në EULEX, dhe kur maska e EULEX-it po ç’erret, ata po e përgatisin “anëtarësimin e vendin tonë NËN BE e NATO. “Mbikëqyrja Ndërkombëtare” koloniale vetëm po i ndryshon maskat. Kosova gjendet nën pranga diktatoriale të Kushtetues dhe Ligjeve diskriminuese të BE të cilat po miratohen e po zbatohen nga pushtetarë të korruptuar vendorë.
Jo zotëri! “Mbikëqyrja Ndërkombëtare” koloniale e juaja mund të përfundojë vetëm kur së bashku me ju dhe me Kushtetutën e Ligjet e juaja destruktive homoseksuale, nga vendi i ynë te shkojnë të gjitha ushtritë e policitë e huaj së bashku me rrjetin e juaj të spiunëve të instaluar në strukturat e pushtetit vasal. Dhe në Kosovë të mbesni vetëm ata që Kosova i fton për të mbetur për një kohë të caktuar dhe me kushte të caktuara.
Vetëm kur Kosovës të mund t'i bashkohen Kosova Lindore, Malësia Shqiptare, Maqedonia Shqiptare dhe me to bashkë ajo t'i bashkohet shteti amë - Republikës së Shqipërisë, mund të thuhet se Kosova u çlirua nga diktatura e huaj. Kosova e ka prioritet bashkimin e vet me shtetin amë Shqipërinë e jo anëtarësimin në OKB, në BE e NATO ku parashihet anëtarësimi edhe i shteteve armike sllave e greke! Vetëm atëherë kur nga pushteti shkon e gjithë anëtarësia titiste e ish-LKJ si dhe agjentura ahtisariste të korruptuar deri ne fyt, të cilët duhet nxjerrë para gjyqit për tradhëti madhore, dhe kur në vend të tyre të shohim Adem Demaçin dhe plejadën e revolucionarëve e patriotëve që gjithmonë iu qëndruan besnik Vendimeve të Kuvendit të Lidhjes së Prizrenit, Programit të LPK dhe betimit të UÇK-së, mund të besojmë se ka përfunduar diktatura e mbikëqyrjes koloniale.
PARASHIHET QË PAS “MBIKËQYRJES NDËRKOMBËTARE” TË EULEX-it TË VIJË MBIKËQYRJA E BE-së DHE NATO-s
Edhe nëse ndodh që “Mbikëqyrja Ndërkombëtare” koloniale e EULEX-it të zëvendësohet me maskën e re koloniale të anëtarësimit të vendit tonë NË-N BE e NATO, lufta e shqiptarëve për mëvetësi e bashkim kombëtar nuk do të ndalet, sikur qeë ajo nuk u ndal kurrë gjatë sundimit shekullor të Perandorisë Osmane. Ata që erdhën në Kosovë dhe e çarmatosën UÇK-në dhe e shkatërruan armatimin e saj derisa në Serbi, Mal të Zi e Maqedoni nuk e dërguan asnjë ushtar e polic të vetin t'i çarmatosë ushtritë kriminale sllave dhe nuk e shkatërruan armatimi e tyre me të cilin u krye gjenocidi, nuk mund të na shiten si aleatët tanë.
Jam njeri nga ata dhjetëra mijëra luftëtarë të lirisë që tërë jetët e veta e të familjeve të veta i kanë shkrirë për të bërë disa hapa drejt lirisë e bashkimit të atdheut tonë të shumë vuajtur, andaj mos të shpresojë kush se ne do të rrimë duarkryq derisa mafia e BE me mafinë vendore, vendin po na e fundosin nën një sundim të ri kolonial. Nëse vet nuk arrimi ta pavarësojmë e bashkojmë kombin tonë, amanetin tonë do ta qojnë në vend fëmijët tanë, duke vazhduar realizimin e Programit e LPK. Populli shqiptar i ka mbijetuar sundimet e Perandorive Bizantine, Romake, Osmane, Jugosllave-Greke e Sovjetike dhe do ta mbijetojë edhe sundimin diktatorial të Perandorisë Globaliste të Bashkimit Evropian. Të gjitha këto Perandori gjigante përfunduan e do të përfundojnë në mbeturinat e historisë, ndërsa Kombi i vogël shqiptar do të jetojë përgjithmonë, sepse ka vitalitetin e vet dhe ka miqësi të përjetshme me anglo-amerikanët!
|
Vërëjtje: Artikujt e botuar në albaniapress.com nuk shprehin domosdoshmërisht mendimet e stafit moderues! |
| Vlerësimi juaj për lajmin |
 |
|
|
|
|
| I keq |
I dobët |
I mirë |
Shumë i mirë |
I mrekullueshëm |
|
|
|
|
|
|
|
| |
|
| Është vlerësuar nga 51 vizitorë |
| Lexuar:
949 herë
|
|
|
|
|
|
|
