|
Me rastin e vizitës në Gjermani Kryetari i Lëvizjes VETËVENDOSJE!, Albin Kurti së bashku me aktivistët e tjerë të Lëvizjes VETËVENDOSJE, Dardan Molliqaj dhe Gentian Sala, nga Sekretariati i Përgjithshëm, Bashkim Osmanaj, kryetar i Qendrës së Lëvizjes VETËVENDOSJE! në Gjermani, është duke zhvilluar takime të rëndësishme me bashkatdhetarë e me përfaqësues të mërgatës shqiptare në atë vend, si edhe me personalitete të jetës politike në Gjermani, në pozitën e tij si Kryetar i Komisionit Parlamentar për Punët e Jashtme. Vizita e Albin Kurtit në Gjermani ka nisur në datën 27 janar dhe do të përmbyllet në 3 shkurt të këtij viti.
Deri më sot Albin Kurti e përfaqësuesit tjerë të Lëvizjes VETËVENDOSJE! kanë zhvilluar disa tubime me bashkatdhetarë në qytetet Düsseldorf, Würzberg, Nürnberg, ndërsa sot në orën 19:00 do të zhvillojë një tubim në Hamburg të Gjermanisë, takime ku janë ngritur disa prej problemeve më thelbësore me të cilat ballafaqohet mërgata jonë, probleme të cilat duhet të zgjidhen përmes një angazhimi institucional të institucioneve të Kosovës. Ndërkohë, si përfaqësues i Kuvendit të Kosovës, e si kryetar i Komisionit për Punët e Jashtme, Albin Kurti ka ndërmarrë këto aktivitete:
1. Takimi në Ministrinë e Punëve të Jashtme (MPJ) të Republikës Federale Gjermane në Berlin, me të ngarkuarin e MPJ-së për Evropën Juglindore, Turqinë dhe shtetet e EFTA-s, zotëri Nikolaus Graf Lambsdorff.
2. Ligjëratë e mbajtur nga Albin Kurti në Institutin Evropian të Politikës, IEP në Berlin: 4 vitet e pavarësisë së Kosovës: "Çka ndryshoi, e çka jo?" (Kjo ligjëratë iu mbajt drejtuesve dhe bashkëpunëtorëve të këtij Instituti).
3. Takim pune me Transparency International në Berlin, me Koordinatoren për programet e Evropës Juglindore znj. Cornelia Abel.
4. Takim me deputeten e Bundestagut, znj. Marieluise Beck, njëkohësisht anëtare e Komisionit Parlamentar për Punë të Jashtme, nënkryetare e Partisë së Gjelbër "Bündis 90/Die Grünen" si dhe anëtare e Parlamentit Evropian.
5. Vizitë në ambasadën e Republikës së Kosovës në Gjermani, dhe takim me ambasadorin z. Vilson Mirdita.
6. Vizitë në ambasadën e Republikës së Shqipërisë në Gjermani, dhe takim me ambasadorin, z. Valter Ibrahimi.
Gjatë të gjitha këtyre takimeve, Albin Kurti foli për zhvillimet aktuale politike, ekonomike dhe sociale në rajon, si dhe e paraqiti gjendjen momentale politike në Kosovë. U fol për partneritetin e rëndësishëm shqiptaro-gjerman, në lidhje me çështjen e Kosovës, por edhe për problematikat që has mërgata shqiptare në atë vend. Në këto takime përfaqësuesit e Lëvizjes VETËVENDOSJE! paraqiten qëndrimet, kritikat dhe idetë.
Lëvizja VETËVENDOSJE!
1 shkurt 2012
|
