Në ditën e dytë të 17-vjetorit “Epopesë së UÇK-së”, në Sallën e Kuqe të Pallatit të Rinisë dhe Sporteve në Prishtinë, është mbajtur një Akademi përkujtimore kushtuar Komandantit legjendar Adem Jashari, familjes Jashari dhe të gjithë dëshmorëve dhe të rënëve për liri.
Në këtë akademi përkujtimore kanë qenë të pranishëm përfaqësues të institucioneve shtetërore e ushtarake, Familja Jashari, familjet e dëshmorëve dhe përfaqësues të botës akademike e kulturore.
Kryetari i Kuvendit të Kosovës, Kadri Veseli në fjalën e tij, para të pranishmëve në këtë akademi, ka folur me pietet për rezistencën e Komandantit Adem Jashari dhe Jasharëve të Prekazit.
Ai ka thënë se Adem Jashari e dëgjoi thirrjen e historisë për liri. “Ai (Adem Jashari) e kuptoi, më mirë nga të gjithë ne, se çfarë kërkonte momenti historik. Kosova nuk mund të mbyllte shekullin e 20-të duke qenë e robëruar. Adem Jashari e dinte se hapi i parë drejt çlirimit është mposhtja e frikës, sepse frika është instrumenti kryesor i sundimit të tiranëve dhe diktatorëve. Të gjithë e dimë se çka ndodhi më pas: historia i dha të drejtë Adem Jasharit dhe Ushtrisë Çlirimtare të Kosovës. Një vit më pas, Kosova u shfaq në anën e ndritshme të historisë: ajo u bë e lirë dhe rigjeti lidhjen e saj të natyrshme në botën perëndimore”, ka deklaruar Veseli, duke shtuar se 17 vjet pas “Epopesë së UÇK-së”, Kosova shtet i pavarur dhe sovran, në themele të të cilit është mundi dhe gjaku i Adem Jasharit, i lagjes martire të Jasharëve dhe mijëra dëshmorëve e martirëve anekënd Kosovës.
Ndërsa, ministri i FSK-së, Haki Demolli, ka thënë se lufta e Komandantit Adem Jashari dhe Familjes Jashari ishte frymëzim për liri. Ai ka deklaruar se luftën e UÇK-së nuk mund ta zbehë askush, e as Gjykata Speciale.
Ministri Demolli në fjalën e tij në këtë akademi ka folur edhe për proceset nëpër të cilat ka kaluar UÇK-ja, TMK-ja dhe tani FSK-ja, që pritet të transformohet në Forca të Armatosura të Kosovës. Të pranishmit në akademinë kushtuar Komandantit legjendar Adem Jashari, i ka përshëndetur me një fjalë, vëllai i tij, bacë Rifat Jashari.
Epoka E Re
|