Në mbledhjen e përbashkët ndërmjet Qeverisë së Republikës së Kosovës dhe e Qeverisë së Republikës së Shqipërisë e cila po mbahet në Pejë, u nënshkruan 12 marrëveshje ndërshtetërore raporton "Zeri.info".
Me këtë rast është nënshkruar marrëveshja për heqjen e çmimeve të shërbimeve roaming për rrjetet publike të komunikimeve të lëvizshme ndërmjet ministrive përgjegjëse për fushën e komunikimeve elektronike të Republikës së Shqipërisë dhe të Republikës së Kosovës, është nënshkruar protokolli për kryerjen e veprimtarive të përbashkëta të kontrollit doganor në pikën e përbashkët të kalimit kufitar Morinë – Vërmicë në mes të Ministrisë së Financave të Republikës së Kosovë dhe Ministrisë së Financave dhe të Ekonomisë së Republikës së Shqipërisë.
Po ashtu gjatë kësaj mbledhjeje është nënshkruar marrëveshja për bashkëpunim në fushën e borxhit publik, të financimeve të huaja dhe marrëdhëniet me institucionet financiare ndërkombëtare, memorandumi i mirëkuptimit ndërmjet Agjencisë për Pronësinë Industriale të Republikës së Kosovës dhe Drejtorisë së Përgjithshme të Pronësisë Industriale të Republikës së Shqipërisë.
Mes marrëveshjeve të nënshkruara mes dy shteteve ishte edhe protokolli ndërmjet Ministrisë së Bujqësisë dhe Zhvillimit Rural të Republikës së Shqipërisë dhe të Ministrisë së Bujqësisë, Pylltarisë dhe Zhvillimit Rural të Republikës së Kosovës për njohjen bilaterale dhe për unifikimin e modeleve të certifikatave shëndetësore, veterinare dhe fitosanitare që do të shoqërojnë ngarkesat e kafshëve të gjalla, të produkteve me origjinë shtazore e produkteve bimore gjatë importit, eksportit dhe transitit midis Republikës së Shqipërisë dhe Republikës së Kosovës.
/Zëri
|