| Atdhe Geci - Poezi |
| Publikuar më 16 mars, 2019 në orën 01:02 ( ) |
Kulturë | |
|
|
|
.
E M B L E M Ë
Unë jam ai i dënuari,
ai i burgosuri, ai trimi.
ai i plagosuri për liri,
që një jetë të tërë
isha në luftë e beteja.
Unë jam ai bandilli,
ai shkruesi i trakteve,
ai ilegalisti i shkathët,
ai që i mbaja parullat
“ Kosova Republikë ”.
Unë jam ai profesori,
ai i bukuri i rrugëve,
ai poeti i trazimeve,
që me studentët trima,
i ramë grusht armikut;
Unë jam ai i dënuari,
ai i bukuri i UÇK-së,
ai piktori i emblemës,-
një i dashuruar i lirisë...
E P I K Ë
Ku i ke trimat, moj shtëpi
derën ty kush ta ka mbyllur
luftë ka kudo nëpër Kosovë
i zoti shtëpisë ku do të jetë
Shtëpia s ́flet, shtëpia hesht
retë nga pak pluskojnë shi
dritaret qajnë për pak diell
era pemët sa shumë i dridh
Ku i ke trimat, moj shtëpi
dikur këtu kishte pesë djemë
dy vajza dhe prindërit e tyre
a thua tani, ku mund të jenë
Shtëpia s ́flet, shtëpia hesht
këtu mungokan edhe fqinjët
me pika gjaku qenka oborri
me pika gjaku qenka shtëpia!..
2
---------------------------------------
Nënë e Drinit e hapi derën:
-eja këtu brenda, ti, o njeri
në kopsht kam dy kufoma
o udhëtar i mirë, më ndihmo
-Kush je ti, o nënë e fisme?
-jam prej gjakut të shtëpisë
tre djem i kam në luftë
ata janë te Mali i Martirëve
-Shoku qytetar prej qytetit
kë po e kërkon këtu i vetëm?
-kërkoj djalin dhe nusen
janë në UÇK, a i keni parë?
-Dreni yt dhe nusja Derada
janë në mbrojtje të atdheut
me ta janë tre djemtë e mi
me ata është tërë Kosova!..
H E R O I K A
Poemë për demonstratat e vitit 1981
Tek po pija kafenë e mëngjesit,
një zë shumëzohej nga qyteti;
lashë kafenë dhe dola në rrugë
në Prishtinë, kudo qe kryengritje
Ajo këngë e zëshme e Kosovës,
ai zemërim gjigant i studentëve,
bekimin e kishte nga populli,
nga vuajtja e tij dhe padrejtësia.
O sa heroik ishte himn i rinisë!
O sa e bukur mu duk Prishtina!
Me të tëra ato duar të bëra grusht
E pashë urtësinë e një vullkani.
Unë, më i vogli poet i Kosovës,
një qytetar i thjeshtë dhe pa tituj,
mblodha vetë disa pika të gjakut
që ai mars-prill ´81 të shkruhet!..
2
------------------------------------------
Studentët, loçkat e shpirtit,
më të mirët e kombit, më të
dashurit; më të patremburit,
thyen xhama, pasqyra, orendi,
goditën figurën e pushtuesit,
për ta nxjerrë në shesh të
vërtetën, dhe atë ferr të bërë.
Në kryengritjet 1968 – 2000
mbi rininë trime të Kosovës
u sul e gjithë ushtria e serbit,
individë të muzgut, karkalecë-
policë me medaljone krimesh,
njerëz me urrejtje të përtejme
specialistë të ndëshkimeve,
titistë me babë dhe me bir,
udbëistë të çajtoreve, berberë
miq të armiqve të sofistikuar,
drejtorë bankash, komunistë,
gjykatës me pozita në shtet-
iu vërsulën rinisë së Kosovës,
moshës sonë më trimërore...
3
————----————--———–
Në ato vite të kryengritjeve
dhe të urtësisë së vullkanit,
një natë në Prishtinë , në
Tavnik e në Ferizaj, në Pejë
e Prizren , në Gjilan dhe në
Gjakovë, në Tetovë e Ulqin,
në Prizren e Skënderaj, në
Preshevë e Kumanovë, në
Mitrovicë dhe në Medvegjë
edhe ëndërrat kullonin gjak...
Prej se njihen të mbjellat
dhe prej se njihen të korrat,
Kosova të bukurën e saj e ka
në gjuhë, në armë, në luftë, -
flisnin gjyshet dhe gjyshërit...
Nëpër traktet e viteve 1981
të çdoditshme ishin thirrjet;
vullneti i popullit nuk shkilet,
vullneti i popullit nuk jepet,
vullneti popullit nuk shuhet,
as me tanke, e as me burgje
Kosova s ́heq dorë nga liria!...
4
—————————------———-
Në ato vite të pushtimit serb
shqiptarët ishim të kërcënuar
natën, ditën, në rrugë, në punë;
sulmoheshin shkollat shqipe,
mielli dhe buka; mësuesi
dhe libri, emri dhe mbiemri,
identiteti, sulmoheshin veshjet,
kostumi dhe veturat, punët e
ditës, ndenjat e vona, njerëzit
e zakonshëm, të mbjellat dhe
të korrat, të drejtat për festat
fëmijët na i arrestonin, sa herë
I kremtonim festat e betejave...
Në ato vite të pushtimit serb
serbët pakicë na gjenocidonin,-
të përkrahur nga Beogradi,
shtienin në çdo gjë shqiptare,
vrisnin që të shpërnguleshim
nga tokat tona stërgjyshore.
Në ato vite të gjenocidit serb
në sofër të familjes shqiptare
mungonin fëmijët, shija dhe
ngjyra e një Kosove të lirë!
5
———————------—————
Në Kosovën e atyre viteve
Prishtina, kryengritësja jonë,
u ngrit lotët t ́i kthejë në gurë,
në grushta, në armë, në beteja!
Zullumi këputet prej së trashi
-shkruan në librin e urtësisë
Prishtina , trimja e Kosovës,
pështyn ekranin e televizorit,
natën e zezë pis dhe ngrihet
shtypjen me grusht ta mbysë!..
Vlimeve të mëdha të Kosovës
kryengritësja kudo na thërriste
të bëhemi me më shumë duar
dhe më me shumë grushta!...
Preshevë, Shkup dhe Tetovë,
të mblidhemi në sheshet tona,
që Kosovën ta bëjmë të lirë,
të bukur dhe të përbashkuar!..
6
———————------————
Kosovë, bëje dorën grusht!
Është çasti i sprovës sonë,
mbaje sqimën, mos u tremb!
Prishtina sonte s ́ ka gjumë,
ajo na do të jemi në betejë
dhe kudo ku ka një prangë
të shtjejmë mbi pushtuesin...
Unë, më i vogli poet, më
i vockli, një banor i Kosovës
i mblodha ca pika të gjakut
kjo poemë të mos humbasë.
Kosovë, sonte nuk jam poet,
sonte jam i njëjtë si gjithë të
tjerët, kam aq gjak në trup
që të jem së bashku me ju...
Prishtinë, e bukura e atdheut,
këngën mos e le të të ikë,
mbaje për zemre, shtrëngoje,
është gjakja jonë e shpirtit!
7
-------------------------------------------
Kosovë, te ti jam më afër ajrit,
Më afër ujit më afër frymës,
Më afër betejave dhe flamurit,
dhe më afër dheut dhe atdheut!..
Këngë të lirisë, këngë trazirash,
Kryengritja fillon tek shtëpitë
Në shesh i kemi djemtë e lirisë
Bijtë e dardanisë së lashtë, bijtë
e Çamërisë; labeatët e Ulqinit,
Këtu kemi Shkupin e Prevezën
dhe Preshevën deri në Nish!...
Prishtina sonte nuk ka gjumë,
Ajo është e tëra në sheshet e saj,
populli ynë është atdhetar,
Tokat e tij ai nuk di t ́i falë!..
Armik, kot qahesh për fitoren
tonë, zullumi këputet prej
së trashi, atë e thotë populli
se ti preke atë që s ́ preket,
dhe shkele atë që s ́shkilet?!
8
----------------------------------------------
Nuk njoh dashuri më të madhe
Se liria, se dheu i atdheut
U ngrita nga birucë e burgut
Ti mar tokat që ti m ́i more!
Se prej këtu e këtej unë jam
zot i tokave të mia, i qiellit tim
Shqipërinë kam dhé e atdhe
përderisa të ketë diell dhe yje!...
Kosovë Dardane bjeri heshtjes
që heshtë, këndo me fuqinë që
ke; në dhomë, në banjo, balkon
këndo në të gjitha shtëpinë
mbushi rrugët me veten tënde
të dëgjoj toka e të dëgjoj qielli
këndo tek të mbjellat tua, bërtit,
dhe mbushe gojën me thirrje
ngrite zërin e përbashkimit tënd
nëpër qytete dhe fshatra, këndo
me sa fuqi ke , dhe shpërndaji
këngët; Shqipëri është Kosova!
Shqipëri janë Iliriadë e Çamëri!
Armik i kombit tim, pushtërues;
Ti preke barkun e butë të grave
tona, pikën më të ndjeshme të
të së bukurës. Zullumi këputet
prej sëtrashi! E ka thënë populli!
Liri e Kosovës quhet Shqipëri!..
Liri e Kosovës ka emrin, bashkim!...
9
----------------------------------------------
Në të gjitha kohërat dhamë gjak
në beteja luftash e burg të gjatë
gjak dhamë për tokë, e për qiell
gjak dhamë për Mars e për Prill;
në Trojën e parë Trojën e ndanë,
në Trojën e dytë Trojën e vranë
në Trojën e tretë fqinjët na ranë
Në të gjitha kohërat gjak dhamë
të lirë të rrojmë në vendin tonë
gjak dhamë për tokë e për qiell
gjak dhamë të rrojmë më mirë!..
Në të gjitha kohërat gjak dhamë
që zot të jemi në atdheun tonë
që diellit t ́i themi mirëmëngjes
dhe lirisë t ́i themi, këtu të kem!..
P O E T I
Në poezi është gjaku im,
Kosova e gjitha kohërave.
sa herë qan a ngec historia,
veton dhe bubullon poezia.
Midis ajrit, frymës dhe ujit,
midis bimëve dhe bëmave,
jeta jonë jo rrallë pluskon
në heshtje dhe pa beteja.
Koha neve na do si do vetë,
jo ashtu si e (duam) ne,
ëndrrës zëshëm i thërras,
po edhe ajo më del e zënë.
Dhjamin dhe metaforat zih
asnjë lloj i artit s´i duron,
poezia ndjehet e trishtuar,
kur poeti emra shenjëzon!..
I BURGOSURI I IDESË
Jam zë i fjalës së plagosur,
jam zë i fjalës së ndëshkuar
dhe jetoj ku jeton Çamëria
dhe jetoj ku jeton Shqipëria.
Në flakët që vetëm rriten,
goditem nga valë të ashpra,
nga përsëritjet monotone
të akteve të konferencave.
Jam zë i fjalës së betejave,
jam vetja ime e paluajtshme,
në këtë tokë të përjetshme,
sa jam i lashtë, aq jam edhe i ri.
Në luftën që kemi përpara
kam plot të pashpërthyera,
jam arti që nuk mburrem
jam arsyeja që nuk jepem...
ÇKA THOTË LIRIA?
Zemrën e kam të fortë,
po trupin në pesë pjesë,
Evropat mua më ndanë,
kur Evropa s ́ish e drejtë.
Kosovës shumë po flitet
se bisedat s ́ janë mirë,
Kosovën e duam tamam
pa pranga e pa mynxyrë.
Imja është kjo tokë, imja,
që nga pellazgët e lashtë;
Shqipëri është Çamëria
shqiptarë janë dhe arvanitët.
Zemrën e kam të fortë,
por trupin në pesë pjesë;
më shumë se një shekull
jam nën degë të rrufesë!..
|
Vërëjtje: Artikujt e botuar në albaniapress.com nuk shprehin domosdoshmërisht mendimet e stafit moderues! |
| Vlerësimi juaj për lajmin |
 |
|
|
|
|
| I keq |
I dobët |
I mirë |
Shumë i mirë |
I mrekullueshëm |
|
|
|
|
|
|
|
| |
|
| Nuk është vlerësuar deri më tani! |
| Lexuar:
305 herë
|
|
|
|
|
|
|
|
|
| |
| NDËRMJETËSIME LETRARE |
E mart, 13 prill 2021 - 22:06
Shtëpia Botuese “ARMAGEDONI”, në prishtinë nxori nga botimi librin: “NDËRMJETËSIME LETRARE – për krijimtarinë e Arif Molliqit”, me autor S... |
| Ja çfarë mendonte Faik Konica për Shqipër... |
E premt, 09 prill 2021 - 00:54
Kush më mirë se Faik Konica mund të perifrazojë shqiptarët ashtu siå ato ishin dhe janë. Ai ishte jo vetëm një nga njerëzit më të ditur dhe më... |
më shumë nga - Kulturë » |
|
|
|
|
|
