|
Austria kushtëzon negociatat mbi kërkesën e pranimit të Islandës në Bashkimin Europian, me diskutimin mbi të njëjtën çështje për Shqipërinë dhe Kroacinë.
Kjo deklaratë është bërë nga ministri Federal i Punëve të Jashtme të Austrisë, Michael Spindelegger gjatë një konference për shtyp të zhvilluar në Vjene. “Çelja e negociatave mbi kërkesën e Islandës për t’u anëtarësuar në BE duhet të përfshijë detyrimisht edhe kërkesën e Kroacisë dhe Shqipërisë”, - është shprehur Spindelegger. Kjo deklaratë ka pasur një jehonë të madhe në shtypin austriak. Kështu, Televizioni Publik Austriak ‘ORF’, Agjencia Austriake e Lajmeve ‘APA’, gazetat e njohura “Die Presse”, apo “Heute”, në dy ditë i janë referuar gjatë këtij argumenti. Kushtit, që duket përbën politikën e jashtme të Austrisë mbi çështje të integrimit. Dr. Spindelegger ka thënë prerë se këto tre vende; Islanda, Shqipëria e Kroacia duhet të përfshihen sa më shpejt, mundësisht në negociatat e afërme të anëtarësimit me unionin. Shqipëria e dorëzoi kërkesën e saj për statusin e vendit kandidat në BE në muajin maj të këtij viti, pavarësisht deklaratave të ndërkombëtarëve se dorëzimi i kësaj kërkese do të ishte më mirë që të bëhej pas procesit zgjedhor. Por, presioni i Austrisë është si një medalje me dy anë; ana e mirë është se mund të sjellë shqyrtimin e shpejtë të saj dhe një vendim, mbase në favor të vendit tonë, por ana tjetër e zbeh optimizmin, nëse sjellim ndërmend vlerësimin paraprak të dhënë nga ndërkombëtarët për zgjedhjet.
Një tjetër deklarim i rëndësishëm politik mbi këtë çështje ka ardhur së fundmi dhe nga ministri i Jashtëm italian, Franko Fratini. Fratini tha se, BE-ja duhet të shprehet qartë dhe me afate të sigurta se kur do të integrojë vendet e Ballkanit Perëndimor brenda gjirit të saj. Shqipëria dorëzoi në Pragë, në 29 maj, aplikimin për statusin e vendit kandidat. Shqyrtimin e kërkesës, zyrtarët e lartë e kanë lidhur me përfundimin e zgjedhjeve të përgjithshme parlamentare në Shqipëri, një proces që do ta marrë në dorë presidenca e aktuale e unionit, Suedia.
|
