|
Kryesia e Partisë Demokratike Shqiptare në mbledhjen e saj të mbajtur më 22.01.2011 ditë e shtunë lëshon këtë :
R E A G I M
PDSH reagon ashpër ndaj aktgjykimit të gjykatës për krime lufte në Beograd, me të cilin janë dënuar nëntë qytetarë shqipëtar të Preshevës me njëqindenjë vit heqje lirie.
Kryesia e PDSH-së vlerëson se ky është një proces i montuar politik në vazhdën e shumë veprimeve të tjera të cilat shteti i serbisë po ndërmerr ndaj shqiptarëve me qëllim të futjes së frikës dhe pasigurisë, si dhe tendencën për barazimin e viktimës dhe krimeve të kryera në Kosovë dhe hapsirat tjera të ish Jugosllavisë nga forcat paramilitare dhe ushtarako-policore serbe viteve të nëntëdhjeta.
Duke u bindur thellë në pafajësinë e nëntë shqiptarëve nga Presheva, kërkojmë nga gjyqi përkatës rishikimin e aktgjykimit dhe anulimin e tij si dhe lirimin e menjëhershëm të tyre. Njëkohësisht kërkojmë nga organizmat ndërkombëtar të instaluar në Beograd që të ushtrojnë ndikimin e tyre në mënyrë që drejtësia në serbi të funksionoj konform standardeve ndërkombëtare.
Prokuroria për krime lufte le të zbardhë rastet e vrasjeve, kidnapimeve dhe masakrave të kryera në Preshevë e Bujanocë nga forcat paramilitare serbe ndaj shqiptarëve të pafajshëm gjatë kohës së luftës në Kosovë e më vonë.
Shërbimi për informim i PDSH-së
Preshevë
Më: 22.01.2011
|
