|
Tregim humoristik
- Sa dhe çfarë ngjyre kanë yjet në Flamurin e Republikës së Kosovës? - pyeti arsimtari i gjuhës shqipe nxënësit në klasën e katër në gjimnaz.
- …shtatë yje të verdhë, profesor, - ia priti me vrull një nxënëse duke menduar në shtatë ditët e javës, - mirëpo profesori i tha se përgjigja nuk është e saktë.
- Pesë yje të kuqë, profesor, - tha një tjetër nxënës, duke menduar në pesë gishtat e dorës dhe në yjet e kuqë proletarë, - mirëpo edhe këtë e mohoi profesori dhe i tha të ulet.
- Mendoj se sipas traditës popullore duhet të ketë tre yje të kaltër… nuk jap më shumë, - tha një nxënës, që ishte më i miri në klasë, për të cilin shokët menduan sikur ia qëlloi, - mirëpo as këtë nuk e pranoi arsimtari.
- Nxënës të dashur… Flamuri i Republikës së Kosovës ka gjashtë yje të bardhë. Nëse ju e keni vështirë të mbani mend yjet në flamurin e Hashim Thaçit, më falni të Republikës së Kosovës, atëherë mund të mbani në mend gjashtë ndjenja të njeriut: zemërimi, urrejtja, dhembja, gëzimi, vullneti, dhe dashuria.
- Nuk e kam ditur që njeriu paska kaq shumë ndjenja. Për shembull, unë nuk di ç’është gëzimi dhe dashuria. Pikërisht, atë ditë kur ka dalë flamuri i ri nuk jam gëzuar, por kam qarë, kurse vajzën që dashurova një kohë të gjatë, ma mori një zyrtar i unmikut, vetëm pse ai kishte automobil, - tha një nxënës dhe fill pas tij e përkrahën të gjithë, se me të vërtet nuk dinin ç’është gëzimi dhe dashuria, këto dy ndjenja që rrallëkush i ka përjetuar.
- Mirë, mirë… nëse keni problem me ndjenja psikologjike, atëherë mund të kujtoheni në gjashtë pjesët e trupit të njeriut: koka, trupi, dy krahët dhe dy këmbët, - shtoi arsimtari.
- Gjepura…! Vëllai im është pa një krah, kurse vëllai i Mimozës nuk i ka dy këmbë dhe sa e sa të tjerë që gjymtyrët i kanë humbur gjatë luftës në Kosovë, prandaj sipas kësaj numri i pjesëve të trupit nuk është i saktë.
- Atëherë më lehtë e keni të mbani në mend gjysmë vitin që i ka 6 muaj, dhe nuk do të gaboni. Sa i përket ngjyrës, mund të kujtoni kapuçin tonë të bardhë, prandaj kurrë nuk do të gaboni kur të shkoni në provim pranues në Universitetin e Prishtinës.
- Zgjidhja e fundit duket se është më e lehtë dhe vendimtare, - tha në shenjë miratimi një nxënës.
- Arsimtar, ylli Davidit i ka gjashtë cepa, dhe kjo ndihmon të mbahet në mend, - tha një tjetër nxënëse.
- Ti po mendon se të gjithë ne dimë për yllin e Davidit… harroje këtë. Më mirë mbahen në mend muajt e gjysmëvitit, - e përmbylli një tjetër.
- Kur të shkoj në provim pranues, do të marrë gjashtë kokrra fasule me vete dhe do t’i numëroj, - tha një nxënëse duke biseduar me zë të ulët me shoqen në bankë, të cilën arsimtari nuk e dëgjoi.
- Po të zuri profesori duke numëruar kokrrat e fasules në provim pranues, vaj halli për ty… - ia priti shoqja e bankës.
- Ç’të duhen kokrrat e fasules, kur ke gjoksin e bardhë, moj bukuroshe! Shkopsiti kopsat në gjoks dhe në provim kalon…, - ndërhyri një tjetër me zë të ulët, pastaj qeshën.
- Po fusha e flamurit çfarë ngjyre ka, nxënës të dashur? - vazhdoi të pyes arsimtari.
- Uaaa, këtë pyetje edhe fëmijët parashkollorë e dinë, - klithi një nxënës dhe fill pas tij qeshën të gjithë për pyetjen e lehtë.
- Atëherë trego çfarë ngjyre ka? - e përsëriti pyetjen arsimtari.
- Lëre të lutem arsimtar!… të kuq, - u përgjigj pas pak nxënësi si me përtesë.
- Duket qartë që nuk e din, - tha arsimtari, ndërkohë që tërë klasa heshti në shenjë habie.
Një nxënës nxjerrë telefonin celular dhe në shtëpi e pyet bacën për ngjyrën e flamurit të Republikës së Kosovës. Baca i tregoi se flamuri ka ngjyrën si fustani i Meritës, (është fjala për motrën Merita).
- Flamuri e ka ngjyrën si fustani i motrës sime, profesor, - u përgjigj një nxënës, që sapo e mbylli celularin.
- Po talleni me mua… Ku di ç’rroba mbani në shtëpi? - i qortoi arsimtari nxënësit. Duket qartë që as këtë pyetje nuk e dini, prandaj po ju tregoj që ta mbani në mend. Fusha e Flamurit të Republikës së Kosovës është e kuqe, më falni se gabova, e kaltër, (nxënësit qeshin për gabimet e arsimtarit). Është normale që unë gaboj, sepse jam rritur dhe kam ngrënë kërbaçin e shkaut për flamurin kuqezi. …Unë e kam vështirë të mësohem me flamurin e kaltër të Ahtisarit, kurse ju nxënës të dashur jeni të rinj dhe e keni më lehtë të mësoheni, - kështu ua sqaroi arsimtari i gjuhës shqipe. Arsimtari do të vazhdonte të sqaronte edhe shumë pengesa tjera, mirëpo ra zili dhe ora e fundit mësimor mori fund.
06.06.2008 |
