Për mediet, partitë politike dhe opinionin publik
Lulëzimi i korrupsionit, nepotizmit, shpërdorimi dhe dhunimi i ligjit, shpërdorimi dhe dhunimi i parasë dhe pronës publike-komunale, diferencimi, denoncimi dhe dhunimi i të drejtave dhe lirive të zyrtarëve të administratës komunale janë vepër dhe përgjegjësi e Nexhmedin Arifit, kryetar i Komunës së Vitisë. Por, Dega e PDK-së në Viti ju njofton (për të satën herë) se Nexhmedin Arifi nuk ka asnjë lidhje organizative dhe as politike me Degën e PDK-së në Viti. Po mbushen tri vjet që N. Arifi ka ikur nga PDK-ja. Politikat dhe veprimtaria e tij komunale nuk janë të PDK-së. Madje, i gjithë angazhimi, politikat dhe veprimtaria e tij janë kundër PDK-së në Viti e më gjerë.
Dega e PDK-së në Viti edhe zyrtarisht para më shumë se dy viteve ka dalë nga koalicioni me AAK dhe AKR-në dhe ka dalë nga qeverisja komunale. Anëtarët dhe votuesit e PDK-së në Viti janë të indinjuar dhe të pakënaqur me “tendencën” e disa medieve dhe të disa partive politike për ta identifikuar N. Arifin me PDK-në në Viti. Kemi parë disa herë në KTV, në RTK, në gazeta të ndryshme dhe së fundi edhe në një “poster” të Lëvizjes Vetëvendosje N. Arifin të paraqitet si zyrtar-kryetar komune i PDK-së i korruptuar, nën hetime, me aktakuza... Prandaj, Dega e PDK-së, anëtarët dhe votuesit e saj të shumtë lusin mediet që mos ta dezinformojnë opinionin dhe mos t’ia ngarkojnë PDK-së (Degës në Viti) korrupsionin, shpërdorimet e shumta, etj. të N. Arifit, i cili ka tri vite që po qeverisë me të gjithë nga pak veç me PDK-në hiç, sepse kjo Degë është distancuar dhe po mbanë qëndrim të rreptë kundër korrupsionit, shpërdorimeve... të N. Arifit. Dega e PDK-së në Viti gjatë dy viteve të qeverisjes me komunën e Vitisë është dalluar për angazhimin e saj kundër korrupsionit, shpërdorimit të detyrës zyrtare dhe të ligjeve në fuqi, është dalluar për punën e mirë. Kjo Degë edhe këto tri vite është dalluar me angazhimin e saj kundër këtyre dukurive të shëmtuara në komunën tonë dhe vazhdon të jetë e vetmja opozitë e qeverisjes së Nexhmedin Arifit në Viti. Duke identifikuar N. Arifin me PDK-në sikur dikush po do me e përgjithësu dhe shpërnda përgjegjësinë. Jo, jo. N. Arifi nuk mund të fshihet pas PDK-së për bëmat e tij të shëmtuara dhe në kundërshtim me angazhimin, programin zgjedhor dhe politikat e kësaj Dege. Secili le të përgjigjet për (mos)punën e tij. Kështu thotë e drejta e shtetit dhe e Zotit.
Kryetari i Degës së PDK-së në Viti
Viti, më 12 mars 2013
|